Úkimet basshysynyń orynbasary Berdibek Saparbaev óńir turǵyndarynyń elordaǵa qonys aýdarýy máselesine qatysty pikir bildirdi, dep habarlaidy QazAqparat.
«Árbir adam elordada turýǵa qyzyǵýshylyq tanytady, sondai-aq kóbisi óz balalarynyń Nur-Sultandaǵy joǵary oqý oryndarynda bilim alǵanyn qalaidy. Bul turǵyda tiisti túsindirý jumystaryn júrgizý kerek, sebebi Nur-Sultan qalasynyń múmkindigi sheksiz emes qoi. Bul turǵyda shahardyń ózindik qýaty men qajettiligi bar», - dedi B. Saparbaev Parlament Májilisiniń jalpy otyrysynan keiin tilshiler saýalyna jaýap bere otyryp.
Úkimet basshysynyń orynbasary bul máselede turǵyn úimen, balabaqshamen jáne mekteppen qamtamasyz etý sharalary ekenin atap ótti.
«Biz tyiym sala almaimyz, alaida qai jerde tiisti jaǵdai jasalǵandyǵy týraly túsindirý sharalary júrgizilýi kerek. Jumyssyz jáne baspanasyz elordada ómir súrý qiynǵa túsedi», - dedi B. Saparbaev.
Onyń sózine qaraǵanda, búginde óńirlerde ómir súrý jaǵdaiyn jaqsartý boiynsha tiisti baǵdarlamalar júzege asyrylýda. Máselen, Elbasynyń tapsyrmasyna sáikes ázirlengen «Aýyl – el besigi» arnaiy baǵdarlamasy bar.
«Osy baǵdarlamanyń negizinde infraqurylym qurylýda. Bul turǵyda tiisti jaǵdai jasaý úshin 3 myńǵa jýyq eldi meken aiqyndaldy», - dedi Úkimet basshysynyń orynbasary.
Eske salsaq, keshe QR Prezidenti Qasym-Jomart Toqaevtyń qatysýymen ótken jiynda elorda ákimi Altai Kólginov qala halqynyń sany turaqty ósip kele jatqany týraly aitqan edi.
