Úkimet basshysynyń orynbasary Berdibek Saparbaev eki siyr túgili bireýimen de kún kórýge bolady dep sanaidy. Tek ol úshin jumys isteý kerek. Bul týraly ol elordada "Januia" otbasy institýtyn qoldaý ortalyǵynyń ashylý saltanatynda aitty, dep habarlaidy Sputnik Qazaqstan tilshisi.
Eki siyr tóńiregindegi áńgime Nur Otan partiiasy saiasi keńesiniń keńeitilgen otyrysynan keiin týyndaǵan edi. Sol joly Tuńǵysh Prezident Nursultan Nazarbaev memleketke alaqan jaiatyndardy synaǵan bolatyn. Elbasy kómek surai beretinderge "eki siyr satyp al da, ózińdi asyra" dep keńes berdi.
Búgin astanada "Januia" otbasy institýtyn qoldaý ortalyǵynyń ashylýynda jýrnalister Berdibek Saparbaevtan osyǵan qatysty pikirin surady.
"Eńbek etseńiz, kún kórýge bolady. Bárimiz de, negizinen, aýyldan shyqtyq qoi. Bir siyrmen de, eki siyrmen de kún kórýge bolady. Biraq ol úshin siyrǵa da jaǵdai jasaý kerek", - dedi vitse-premer.
Ol áńgime eki siyr da emes, halyqtyń jumys isteýinde ekenin aitty.
"Eshkim eshkimge jem-shópti ákep bermeidi. Qudaiǵa shúkir, bizdiń jerimiz de, shóbimiz de, sýymyz da jetkilikti. Tek áreket jasaý kerek. Ol siyrǵa jem-sýyn der kezinde berseń, eń kem degende 7-8 litr sút beredi. Sol súttiń 2-3 litri ózińniń qajetińe ketse, qalǵanynan mai da, qurt ta, qatyq ta, qaimaq ta shyǵady. Áńgime eki siyrda emes. Áńgime halyqtyń jumys isteýinde. Óitpesek bolmaidy, aǵaiyn!", - dedi Saparbaev.
Osy oraida Úkimet basshysynyń orynbasary on eki múshesi saý adamdardy jumys isteýge shaqyrdy.
"Ásirese balalarymyzdy eńbekke baýlýymyz kerek. Ásirese, aýyl balalaryn", - dedi ol.
Aita keteiik, búgin Nur-Sultanda "Januia" otbasy institýtyn qoldaý ortalyǵy ashyldy. Saltanatty jiynǵa premer-ministrdiń orynbasary Berdibek Saparbaev men qala ákimi Altai Kólginov qatysty.
"Januia" ortalyǵynda otbasylarǵa zańgerlik, psihologiialyq jáne áleýmettik kómek kórsetiledi.
Ortalyqta 12 memlekettik jáne kvazimemlekettik sektor jumys isteidi. Olar 70-ten astam qyzmet kórsetedi. Atap aitqanda, ataýly áleýmettik kómek alý, kásiptik oqýdan ótý, jumysqa ornalastyrý, jappai oqytý baǵdarlamasyna qatysý, balabaqshaǵa kezekke turý, qamqorshylyq ornatý, járdemaqy alý jáne taǵy basqa máseleler boiynsha.
Sondai-aq, mekemede analarǵa arnalǵan "Kásipker ana" atty ortalyǵy da ashylǵan.
Budan bólek, ortalyqta qala ákiminiń ashyq qoǵamdyq qabyldaýy jumys isteidi. Aýdan ákimderi, basqarmalar men basqa da uiymdardyń basshylary da bekitilgen kestege sáikes azamattardy qabyldaidy.
Ortalyq dúisenbi men juma aralyǵynda, saǵat 9.00-den 18.00-ge deiin jumys isteidi.
