Jambyl oblysynyń ákimi Berdibek Saparbaev burynǵy aýyl sharýashylyǵy ministri Saparhan Omarovtyń qyzmetten ketýin nege qoldaitynyn túsindirdi, dep jazady Sputnik agenttigi.
Jýrnalist Nartai Aralbaiuly YouTube-kanalyndaǵy suhbatynda Saparbaevtan qýańshylyqqa bailanysty qyzmetinen ketken burynǵy aýyl sharýashylyǵy ministri Saparhan Omarovtyń otstavkasyn qoldaisyz ba dep surady.
"Qoldaimyz, árine. Ol aýyl sharýashylyq ministri boldy, sol salaǵa jaýap beretin. Ministr jergilikti ákimdermen jumysty uiymdastyrýy kerek. Onyń ústine biyl qýańshylyq bolatyny belgili edi, boljam boldy", - dep jaýap berdi Berdibek Saparbaev.
Ol biyl kórshi Qyrǵyzstanda da sý tapshy ekenin atap ótti.
"Biz sýdyń seksen paiyzyn Qyrǵyzstannan alamyz. Qyrǵyzstannyń ózine sý jetispei jatyr. Ol jaqtan sýdy Qyzylorda, Túrkistan oblysy alady. Iaǵni aldyn ala belgili boldy. Soǵan sai jumystar jasaýy kerek edi. Ókinishke qarai osylai boldy", - dedi oblys ákimi.
Sondai-aq Saparbaevqa "dál qazir úkimettiń jumysyna kóńilińiz tola ma, joq pa?" degen saýal qoiyldy.
"Qýańshylyq tabiǵattyń isi ǵoi endi. Biraq, meniń oiymsha, bul jerde eń birinshi jumys isteitin – jergilikti ákimder. Boljam bar ǵoi. Mysaly qazir shilde aiynda bir tamshy jańbyr jaýmaidy. Iaǵni, biz erteń ózimizge kerek shópti qalai jinap alamyz dep oilanýymyz kerek. Bizge 1 million 700 myń tonna shóp kerek. Qazir sharýalarǵa qandai shóp bar, sonyń bárin oryp alyńdar dep aityp jatyrmyz. Shilde osyndai bolsa, tamyz aiy qandai bolatynyn biz bilmeimiz. Qansha degenmen qazaqpyz ǵoi, "erteń egindi jinap alǵannan keiin, qyrkúiek-qazanda shópti jinap alamyz dep" asyqpaimyz. Biraq aýa raiy osyndai bolyp tura berse, kúzde qandai shóp bolady?!", - dedi óńir basshysy.
Buǵan qosa, ol qazir ministrlikpen orman qoryndaǵy jerdi jaiylym, shabyndyqqa paidalaný boiynsha jumys júrgizilip jatqanyn aitty.
"Biz komissiia qurdyq. Men olarǵa árbir aýyl, úidi-úidi aralap, qansha maly bar, shóp jinady ma, joq pa, suraý kerek ekenin aittym. Shóp jinamasa, erterek qimyldasyn. Árine, biliktiń de kinási bar shyǵar. Biraq, eń aldymen, jergilikti halyq óz múmkindikterin tolyq paidalanýy kerek", - dedi Saparbaev.
10 shildede Prezident Qasym-Jomart Toqaev aýyl sharýashylyǵy ministri Saparhan Omarovty qyzmetinen bosatty.
Memleket basshysy Mańǵystaý jáne Qyzylorda oblystaryndaǵy qaýańshylyqqa bailanysty aýyl sharýashylyǵy ministrligi men ákimdikter tarapynan tiisti sharalardyń qolǵa alynbaǵanyn atap ótti.
"Sondyqtan osy salaǵa birden bir jaýapty tulǵa retinde ministr Saparhan Omarovtyń otstavkaǵa ketkeni durys dep esepteimin", - dedi Toqaev Úkimettiń keńeitilgen otyrysynda.
