Oblys ákimi Berdibek Saparbaevtyń tóraǵalyǵymen ótken oblystyq jedel shtabtyń kezekti otyrysynda azyq-túlik taýarlary baǵasynyń ósýine jol bermeý jáne onyń aldyn alý sharalary saralandy, dep habarlaidy "Ult aqparat" oblys ákiminiń baspasóz qyzmetine silteme jasap.
Densaýlyq saqtaý basqarmasynyń basshysy Marat Jumanqulovtyń aitýynsha, óńirde COVID-19 virýsymen aýyrǵan adamdardyń sany buǵan deiin tirkelgen 3 jaǵdaimen qalyp otyr.
Baiandamashy quqyq qorǵaý organdarynan azamattardyń dárigerlerdiń zańdy talaptaryna baǵynbaýyna qatysty máselelerdi sheshýge atsalysýyn surandy. Mundai oqiǵa Qordai aýdanynda oryn alǵan. Ondaǵy turǵyn tek uzaq áńgimelesýden keiin ǵana aýrýhanaǵa barýǵa kónip, qajetti taldaýlardy tapsyrǵan. Taldaý nátijesi teris bolyp shyqqan, eger jaǵdai basqasha bolǵanda, onda másele tipti kúrdelene túsýi múmkin edi.
Shtab basshysy Berdibek Saparbaev bul jaitqa bei-jai qaramai, oblystyq politsiia departamenti bastyǵynyń orynbasary Temirbek Orazymbetovke naqty tapsyrmalar júktedi. Ózine de, ainalasyndaǵylarǵa da qaýip tóndirgen, tótenshe jaǵdai rejimin buzǵan adamdarǵa qatysty zańdy jazalaý sharalaryn qoldanýdyń mańyzdylyǵyn basa aitty.
Sondai-aq, jiynda kásipkerlik jáne indýstrialdy-innovatsiialyq damý basqarmasy basshysynyń mindetin atqarýshy Jandáýlet Kenjebekovtiń azyq-túlik taýarlarynyń baǵasyn ustap turý jónindegi jumystarynyń nátijesizdigin oblys basshysy synǵa aldy.
- Búgingi tańda halyqty alańdatyp otyrǵan basty máselelerdiń biri – baǵa turaqsyzdyǵy. Siz ózińiz eki apta ishinde negizgi azyq-túlik taýarlarynyń qunynyń ne sebepti ósip otyrǵanyna taldaý júrgizip kórdińizbe? Baǵanyń ósýi kóptegen saýda jelilerinde baiqalýda. Basqa ónimder týraly aitpaǵannyn ózinde, eń bolmaǵanda tuz baǵasyn ustap tura almaimyz. Qurylǵan mobildik toptardyń jumysy sátsiz júrgizildi. Biz mundai jaǵdaida jumys oryndaryn saqtap, baǵanyń sharyqtaýyna jol bermeýge tiispiz, - dedi oblys ákimi.
Aimaq basshysy óziniń orynbasary Nurjan Kalenderovke prokýratýra jáne monopoliiaǵa qarsy qyzmet qyzmetkerlerimen birge áleýmettik mańyzy bar azyq-túlik taýarlaryna baǵanyń kóterilý sebebin tekserýdi tapsyrdy.
