Sarysý aýdanyndaǵy eki kúndik jumys sapary barysynda Jambyl oblysynyń ákimi Berdibek Saparbaev birqatar mádeni-áleýmettik nysandardyń, ónerkásip jáne kommýnaldyq kásiporyndarynyń jumysymen tanysty.
Sondai-aq, jergilikti turǵyndarmen kezdesýler ótkizdi, - dep habarlaidy "Ult aqparat" oblys ákiminiń baspasóz qyzmetine silteme jasap.
Oblys basshysynyń aýdandaǵy jumys sapary Saýdakent aýylynan bastaldy. Atalǵan aýyldaǵy emhana ǵimaratyna kúrdeli jóndeý jumystaryn júrgizý máselesine nazar aýdarǵan B.Saparbaev ondaǵy emdelýshilerdiń jai-kúiinen habardar boldy.
Tehnikalyq-shyǵarmashylyq mektebinde ótken aýyl turǵyndarymen kezdesýde B.Saparbaev áleýmettik salany damytý, aldaǵy basymdyqtardy anyqtaý, jerdiń tiimdi paidalanylýyn zerdeleý, sýarmaly alqaptardy keńeitý, sharýa qojalyqtaryn irilendirý, mal basyn kóbeitý, shaǵyn nesie men granttar berý arqyly shaǵyn jáne orta kásipkerlikti damytý isine airyqsha kóńil bóldi.
Aimaq basshysy barǵan kelesi nysan – Jańatas qalasy mańynda ornalasqan qýaty 100 megavatt, quny 130 million AQSh dollaryn quraityn jel elektr stantsiiasy boldy. Qurylysy qyzý júrip jatqan JES-tiń búginde 20 jel qondyrǵysy ornatylyp úlgerilgen. Aldaǵy ýaqytta olardyń sany 40-qa jetpek. Qazirgi tańda joǵarǵy voltty elektr ótkizý jelilerin tartý, KEGOC biryńǵai operatorymen tiisti shart jasasý sharalary aiaqtalǵan. Nysan iske qosylǵan kezde 30 adam turaqty jumyspen qamtylmaq. Sondai-aq, aýdandaǵy jumys sapary barysynda oblys basshysy reseilik «Evrohim-Tyńaitqysh» kompaniiasy mineraldy tyńaitqyshtar shyǵaratyn zaýyt qurylysyn jalǵastyrýda. Bul oraida salynatyn investitsiia kólemi 1 mlrd. AQSh dollaryn qurasa, joba júzege asqanda 900-den asa turaqty jumys orny ashylmaq.
Aita keteiik, Sarysý aýdanyndaǵy apatty jaǵdaidaǵy jáne úsh aýysymdy mektepterdiń máselesi tolyǵymen sheshilgen. Alaida, pedagog kadrlardyń tapshylyǵy joq emes desek, Túrkistan aýylyndaǵy M.Áýezov atyndaǵy mektepke at basyn burǵan oblys ákimi 23 shtattyq birliktiń bos turǵanynan habardar boldy.
«Oblysymyzda pedagogikalyq joǵary oqý orny bola tura, aýdandar muǵalim tapshylyǵy máselesin bastan keshýi orynsyz», - dedi B.Saparbaev.
Budan soń, oblys ákimi basqa da kásiporyndar men aýdanda júzege asýy josparlanyp otyrǵan jobalarmen tanysty.
Oblys basshysynyń aýdandaǵy jumys sapary Jańatas qalasyndaǵy Mádeniet úiindegi aýdan aktivimen kezdesýde túiindeldi. Basqosýda jergilikti turǵyndar óńirdegi himiialyq óndiristerdiń qorshaǵan orta men adamdardyń densaýlyǵyna ziiandy áseri, aýyz sýdyń sapasy, azyq-túlik baǵasynyń qymbattylyǵy, turǵyn úi qoryn qalpyna keltirý, múgedektigi boiynsha járdemaqy tóleý máselelerin kóterdi.
«Biz qolda bar áleýetti azamattardyń ál-aýqatyn jaqsartý, ekonomikanyń ósýi men áleýmettik mindetterdi sheshý jolynda barynsha paidalanýǵa tiispiz. Aýdannyń damýyna óz úlesin qosyp otyrǵan «Eýrohim Tyńaitqysh« jáne «Qazfosfat« iri kásiporyndarynyń mańyzy erekshe.
Azyq-túlik baǵasy ósip otyrǵanyn jasyra almaimyz. Óitkeni ózimizden óndiriletin ónim az. Osy oraida aýyl turǵyndary birinshi kezekte ózin de, oblys halqyn da óz azyq-túligimen qamtamasyz etýge barynsha atsalysýy tiis.
Ártúrli memlekettik baǵdarlamalarǵa belsendi túrde qatysyp, tómen paiyzdy nesieler arqyly óz kásipterin ashýǵa talpyný kerek.
Biz óndiris oryndarynyń ekologiialyq normalardy saqtaýyn, azamattardyń densaýlyǵyn qorǵaýdy qatań baqylaýda ustaimyz. Bul – biliktiń negizgi mindetterniniń biri.
Men ákimderge halyqpen jii kezdesýler ótkizip, azamattardyń saýaldaryna qulaq túrip otyrý kerektigin basa aitqym keledi. Ákimderdiń esepteri qurǵaq baiandama, bos ýádemen ótpeý kerek. Ondai jiyndarda mańyzdy máseleler kóterilip, ótkir suraqtarǵa tolyq jaýaptar berilýi tiis. Óz halqynan qorqatyn ákim – basshy bola almaidy, – dep túiindedi aimaq basshysy óz sózin.
