Qyrǵyzstannyń burynǵy Premer-ministri Sapar Isakovty Bishkektiń Sverdlovsk aýdandyq sotyna májbúrlep ákeldi. Bul aqparatty Azattyqtyń Qyrǵyz qyzmetine Sapar Isakovtyń advokattary Zamir Jooshev pen Nurbek Toktakýnov habarlady, dep jazady "Ult aqparat".
Advokattardyń sózine qaraǵanda, Sapar Isakovty sotqa Qyrǵyzstan memlekettik ulttyq qaýipsizdik komiteti qyzmetkerleri jetkizgen. Jooshev muny "zańdy buzý" dep biledi, "óitkeni mundai ispen sot pristavtary ainalysýy tiis" dep sanaidy.
Qyrǵyzstan memlekettik ulttyq qaýipsizdik komitetiniń tergeý izoliatorynda otyrǵan Isakovty sot otyrysyna qatysýdan bas tartqan jaǵdaida májbúrlep ákelý týraly sheshimdi Bishkek jylý elektr stantsiiasyn modernizatsiialaý kezindegi jemqorlyq isi boiynsha sot protsesiniń tóraiymy, Bishkek qalasy Sverdlovsk aýdandyq sotynyń sýdiasy Inara Giliazeddinova qabyldaǵan bolatyn.
Isakov 25 qazanda sotqa qatyspaitynyn málimdep, kamerasynan shyǵýdan bas tartqan. Ol bul sheshimin Bishkek jylý elektr stantsiiasyn modernizatsiialaý kezindegi jemqorlyq isi boiynsha keibir kýálerdiń tergelmegenimen bailanystyrǵan.
Jylý elektr stantsiiasyn (JES) modernizatsiialaý kezindegi jemqorlyq isi boiynsha sot protsesi biyl 19 aqpanda bastalǵan. 5 maýsymda Qyrǵyzstan burynǵy Premer-ministri Sapar Isakov qamaýǵa alynǵan.
Bishkek jylý elektr stantsiiasynda jóndeý aiaqtalǵan soń bir ai ótpei, 2018 jyly qańtarynda aqaý shyǵyp, Bishkek qalasynyń jartysy jylýsyz qalǵan edi. Osy oqiǵadan keiin tergeý bastalǵan.
