Qazaqstan Respýblikasy Úkimetiniń Qaýlysymen Jarkeshov Sanjar Serikbaiuly QR Ekologiia, geologiia jáne tabiǵi resýrstar vitse-ministri bolyp taǵaiyndaldy, dep habarlaidy Úkimettiń baspasóz qyzmeti.
Vedomstvoda Sanjar Jarkeshov geologiia máselelerine jetekshilik etetin bolady.
Sanjar Jarkeshov 1986 jyly 24 qazanda Qaraǵandy oblysynda týǵan. 2009 jyly Qazaq ekonomika, qarjy jáne halyqaralyq saýda ýniversitetin «qarjy» mamandyǵy boiynsha, al 2010 jyly - Ostin q. (AQSh) Tehas ýniversitetin «munaigaz injiniringi» mamandyǵy boiynsha bitirgen.
Eńbek jolyn 2008 jyly Tehasta (AQSh) Ostin qalasynda Munai jáne geojúielik injiniring ortalyǵynyń zertteýshi injeneri bolyp bastady, onda 2010 jylǵa deiin jumys istedi.
2010-2016 jyldary «ExxonMobile» Korporatsiiasynda Kaliforniia, Kolorado jáne Tehas (AQSh) shtattarynda burǵylaý jónindegi injener, Irakta burǵylaý jónindegi aǵa injener, Reseide (Sahalin araly) burǵylaý jónindegi bas injener, Atyraý qalasynda aǵa jobalyq injener bolyp eńbek etti.
2016-2018 jyldary - Shotlandiiadaǵy Pert qalasynda «Merlin ERD» kompaniiasynda kásipshilik sýpervaizerler basshysy jáne burǵylaý jónindegi jetekshi injener boldy.
2018 jyldyń naýryz aiynan qazirge deiin Ulybritaniiada London qalasynda McKinsey and Company kompaniiasynda munai ónerkásibiniń jahandyq sarapshysy jáne basqarýshy keńesshisi bolyp jumys istedi.
