Kenesary hanǵa qatysty jádigerler boiynsha úlken kórme ótkizý úshin reseilik mýzeilermen kelissózder júrgizý kerek. Bundai pikirdi «Qasietti Qazaqstan» ǵylymi-zertteý ortalyǵynyń basshysy Berik Ábdiǵaliuly aitty, dep jazady "Ult aqparat".
«Jaqynda Reseige barǵanda Kenesary hanǵa tiesili osy kiseni kórdik. Kenesary hannyń myltyǵy Ombyda saqtaýly turǵany málim boldy. Sondyqtan reseilik mýzeiler Kenesaryǵa bailanysty Qazaqstanda kórme ótkizse, óte jaqsy bolar edi. Iaǵni basqa da tulǵalarǵa qatysty jádigerlerdi ákelip tursa, buny jaqsy bastama dep baǵalar edik», - deidi ol.
Aita keteiik, búgin Berik Ábdiǵaliuly Feisbýktegi paraqshasynda Sankt-Peterbýrgte Kenesary hannyń kisesi saqtalǵany anyqtalǵanyn jazdy.
«Alash áskeri taqyrybyn zerttep júrip, Seiilbek Janaidarovtyń 1915 jyly Sankt-Peterbýrgtegi Resei etnografiialyq mýzeiine Kenesary hannyń kisesin tapsyrǵany týraly derek kezdestirdim. Bul jádiger «Kse - poias kirgizskogo hana Srednei Ordy» degen atpen atalǵan mýzeidiń qorynda búgingi kúnge deiin saqtalǵan eken. Ony Mádeniet jáne sport ministri Arystanbek Muhamediulymen Sankt-Peterbýrgtegi mýzeige barǵanda óz kózimizben kórýge múmkinshiligi týdy», - dep jazdy áleýmettik jelide ol.
Osy oraida ol Seiilbek Janaidarov 1918 jyly Atbasar Alash áskeri divizionyn qurǵan ári Alashorda úkimetiniń kandidat múshesi bolǵan azamat ekenin eske salyp ótti.
«Bul jádiger Seiilbek Janaidarovtyń qolyna qalai túskenin zerttei kele anyqtaǵanymyz - ol kise Seiilbektiń atasy - Kenesary hannyń áskeri qolbasshylarynyń biri Janaidar Orynbaiulynan qalǵan mura eken. Janaidar batyrdyń erlikteri týraly Musa Shormanovtyń, Máshhúr Júsiptiń, Doskei aqynnyń, Jambyldyń, Imanjan Jylqaidarulynyń estelikteri men jyrlarynda kezdesedi. Sondai-aq bul týraly I.Esenberlinniń «Qahar» romanynda da jazylǵan. Batyrdyń urpaqtarynyń aitýynsha, Kenesary han ózin ólimnen birneshe ret qorǵap qalǵany úshin ári kórsetken erlikteri úshin atalǵan kiseni Janaidar Orynbaiulyna tartý etken. Jalpy Kenesary óz batyrlaryna soǵysta kórsetken erlikteri úshin orden-medal ornyna alǵys retinde úlken syi-siiapatpen marapattaý dástúri bolǵan. Sondai-aq Kókshetaý shaiqasynda jeńiske jetkeni jáne shynaiy erjúrektik kórsetkeni úshin Kenesary Aǵybai batyrǵa atasy Abylai hannan qalǵan qanjardy tartý etken eken. Bul týraly aqparatty jaqyn arada tolyǵyraq kórsetemin», - dep jazdy Berik Ábdiǵaliuly.
