Búgin Parlament Májilisindegi Úkimet saǵatynda densaýlyq saqtaý problemalaryn talqylaý kezinde depýtat Jámilá Nurmanbetova SES ǵimarattarynyń ábden tozǵanyn aitty, dep habarlaidy QazAqparat.
«Sońǵy 5-7 jylda qyzmetten joǵary bilikti mamandardyń ketýine jol berý de ótkir problema bolyp otyr, bul tutastai alǵanda, qyzmettiń kadr quramynyń biliktiligine áserin tigizdi. Sanepidqyzmet jumyskerleriniń joǵary kásibi sheberligin qalyptastyrý úshin tálimgerlik tetikterin damytý, stýdentterdi daiarlaýdyń bilim berý baǵdarlamalaryn qaita qaraý qajet dep sanaimyz. Sondai-aq gigiena, sanitariia, epidemiologiia, virýsologiia, bakteriologiia, parazitologiia, infektsiialyq aýrýlar siiaqty beiindik pánderdi oqytý kólemin ulǵaitý qajet», - dedi J. Nurmanbetova.
Onyń aitýynsha, materialdyq-tehnikalyq bazanyń nasharlyǵy, joǵary tehnologiialyq jáne innovatsiialyq zerthanalyq jabdyqtardyń joqtyǵy, jeke qorǵanysh quraldary sanynyń jetkiliksizdigi de óz aldyna problema bolyp otyr.
«Mysaly, «Ulttyq saraptama ortalyǵynyń» jaraqtandyrylýy tek 71,6 %-dy, al zerthanalyq jabdyqtyń tozýy 65 %-dy ǵana quraidy. Osyndai kórsetkishterge qarai kele, «zertteýlerdiń anyq nátijelerin alýǵa bola ma?» degen suraq týyndaidy Buǵan qosa, Densaýlyq saqtaý ministri atap ótkendei, SES ǵimarattarynyń 80 % jáne avtokóliktiń 64 % tozyǵy jetken. Mundai jaǵdaida infektsiialyq aýrýlardyń oshaqtaryn qalai jedel anyqtaýǵa jáne óńdeýge, epidemiiaǵa qarsy sharalardy qabyldaýǵa bolady?», - dedi depýtat.
SES-tiń ǵylymi áleýetin kúsheitý erekshe nazar aýdarýdy talap etedi. Jańa infektsiialyq aýrýlarǵa arnalǵan tásilderdiń zerdelenbeýi, ǵylymi zertteýlerdiń bolmaýy, praktika men ǵylym arasyndaǵy bailanystyń álsizdigi, jas ǵalymdardyń bolmaýy tiisti sharalar qabyldaýdy qajet etedi.
«Ol úshin ǵylymi negizdelgen tásilderdi eskere otyryp, epidemiologiialyq ahýaldy boljaý modelin jetildirý kerek. Sondai-aq, osy baǵyttaǵy zertteýlermen ainalysatyn jas ǵalymdardy qoldaý jónindegi sharalar qajet», - dedi ol.
