.jpeg)
«Samuryq-Qazyna» ulttyq ál-aýqat qorynyń ǵimaratynda búgin qoǵamdyq keńestiń kezekti otyrysy ótti. Onyń tóraǵasy Bolat Jámishev pen keńes músheleri aldynda búgin qordyń jaýapty qyzmetkerleri esep berip, jiynda el kókeiinde júrgen máseleler qozǵaldy, dep habarlaidy "Ult portaly".
«Samuryq-Qazyna» qory jáne onyń enshiles kompaniialarynda bul kúnde 258 myńǵa tarta qyzmetker eńbek etedi. Qordaǵy 279 portfeldi kompaniianyń tabysy Qazaqstannyń jalpy ishki óniminiń 6,2 paiyzyn quraidy. Otyrysta esep bergen «Samuryq-Qazyna» qyzmetkerleri reformalaý baǵdarlamalary men júieli is-sharalar týraly sóz qozǵady. Qarjylyq kórsetkishterin jariialady. Jemqorlyqqa qarsy kúres pen kompleans máseleleri jóninde de aitty. Josparyn da bólisti.
Negizgi esepten keiin Qoǵamdyq keńes múshesi Erlan Sairov demalys kezinde áýe jáne ushaq biletteriniń baǵasy, gaz baǵasy men qordyń sportqa bóletin qarajatynyń máselesin kóterdi. Ekonomist Daniiar Temirbaev IRO-ǵa qatysatyn aktsionerler tiisti deńgeide qorǵalýy kerektigin aitsa, Aidar Qazybaev «Samuryq-Qazyna» basshysynyń ózi kópshilik aldynda esep berse degen tilegin bildirdi.
Otyrys edáýir qyzý talqymen ótkenin atap ótý kerek. Qor qyzmetkerleri de óz pozitsiiasyn qorǵap, keńeste kóterilgen máselelerdi nazarǵa alatyndaryn aitty. Máselen, «Samuryq-Qazyna» AQ basqarýshy direktory Ǵibrat Aýǵanov qordyń áleýmettik máselelerge basa nazar aýdaratynyn atap ótti. Onyń aitýynsha, qor óńirlerdegi máselelerdi de nazardan tys qaldyrmaidy. Máselen, taiaýda ǵana Semeide qordyń qoldaýymen jylyna 1200 balany qabyldai alatyn ońaltý jáne erte aralasý ortalyqtary ashyldy. Ol jerde erekshe qajettiligi bar balalar emdelip, qoǵamǵa beiimdelý múmkindigine ie bolady. Mundai áleýmettik jobalar birshama óńirde bar deidi ol. Qordyń ókilderi tarapynan Sáken Pirmahanov pen Dáýren Aqshalov ta keńes músheleri qoiǵan ózekti suraqtarǵa jaýap berdi.
«Óz tarapymnan qosarym: jańa baǵdarlamalar árdaiym jaqsy. Óitkeni ýaqyt ótken saiyn mindetterdiń mańyzyn qaita qarap, taldap otyrý kerek. Jańa baǵdarlamalardy soǵan qarai túzep otyrýǵa týra keledi. Alaida jańa baǵdarlamalar týraly sóz bolǵanda onyń aldyndaǵy baǵdarlamalar keiinge ysyrylyp qalady. Sol sebepti baǵdarlamanyń jańasyna júgirip, eskisin umyt qaldyrýǵa bolmaidy», - dep eskertti Bolat Jámishev.
Keńes tóraǵasy otyrysty qorytyndylai kele holding basshylyǵyna eń birinshi kezekte kompaniianyń qoǵamǵa mańyzdy máselelerine basymdyq berse dep ótinishin bildirdi.
