Biyl «Samuryq-Qazyna» ulttyq ál-aýqat qorynyń taza tabysy 1,2 trln teńgeden 167 mlrd teńgege deiin qysqarady. Bul týraly atalǵan qordyń basqarma tóraǵasy Ahmetjan Esimov aitty, dep habarlaidy QazAqparat.
«Álemdik ekonomikada oryn alǵan retsessiia men qaýipti indettiń keńinen taralýy qor tobyna kiretin kompaniialardyń aǵymdaǵy jumysyna aitarlyqtai áserin tigizdi. Osyǵan orai kompaniialardyń tiimdiligin arttyrýǵa baǵyttalǵan birqatar sharalar qabyldanyp, iske asyrylyp jatyr. COVID-19 indeti, munai baǵasynyń tómendeýi, ulttyq valiýta baǵamynyń quldyraýy óziniń teris áserin de tigizip otyr. Biyl qordyń taza tabysy 1,2 trln teńgeden 167 mlrd teńgege deiin tómendemek. Ásirese, «QazMunaiGaz» taza kirisiniń 8,4 paiyzynan qaǵylatyndyǵy kútiledi. Áýe jáne temir jol jolaýshylary aǵynyń kólemi 40 paiyzǵa deiin azaimaq», - dedi Ahmetjan Esimov Elbasy Nursultan Nazarbaevtyń tóraǵalyǵymen ótken qordy basqarý jónindegi keńeste.
Osy oraida Ahmetjan Esimov qordyń ótken jylǵy jyldyq esebin Elbasyna tanystyrdy. Oǵan sáikes, qordyń satylymnan túsken kiris kólemi 31 paiyzǵa, aktivteriniń taza quny 30 paiyzǵa ulǵaiǵan. Taza kirisi 2 ese artyp, 1,2 trln teńgeni quraǵan.
«Qarjylyq qor quryldy. 8 mlrd syrtqy qaryz óteldi. Bul 1 trln teńgeniń baǵam táýekelinen jaltarýǵa jáne jyl saiyn valiýta qajettiligi úshin syrtqy qaryzdarǵa qyzmet kórsetýge jumsalatyn qarajatty 260 mlrd teńgege tómendetýge múmkindik berdi. Qazirgi ahýaldy eskere otyryp, kompaniianyń kúrdeli operatsiialyq shyǵystaryn 420 mlrd teńgege qysqarttyq. Bul belgili bir qarjylyq qor qurýǵa múmkindik berip otyr. Munyń barlyǵy energetikalyq, munai-gaz, ýran, telekommýnikatsiia, poshta jáne ózge de salalardaǵy kásiporyndardyń jumys isteýi úshin aitarlyqtai qarjylyq rezerv jasaqtaýǵa, qyzmetkerlerdi qysqartýsyz saqtap qalýǵa jáne jumysshylarǵa der ýaqytynda jalaqy tóleýge jol ashty», - dedi ol.
Qor basshysy joǵaryda atalǵan sharalarmen qatar qazirgi qiyn ahýalda ulttyq ekonomika men otandyq taýar óndirýshilerdi qoldaý tetikteri júzege asyrylyp jatqanyn atap ótti.
«Olar - úsheý. Birinshi - tetikterdiń ózin jetildirý. Ekinshi - jańa óndiris oryndaryn qurý baǵdarlamasyn júzege asyrý. Úshinshiden jumys istep turǵan kásiporyndardy qoldaý baǵdarlamasyn qabyldadyq», - dedi A.Esimov.
