«Samuryq-Qazyna» UÁQ» AQ men Soltústik Qazaqstan oblysynyń ákimdigi yntymaqtastyq týraly memorandýmǵa qol qoidy. Taraptar óńirde jańa óndiristerdi ashýdy yntalandyrýǵa jáne áleýmettik-ekonomikalyq yntymaqtastyqty damytýǵa kelisti, dep habarlaidy "Ult aqparat".
Búgin SQO-ǵa «Samuryq-Qazyna»UÁQ» AQ basshysy Ahmetjan Esimov keldi. Qordyń qoǵammen bailanys jáne marketingtik kommýnikatsiialar jónindegi departamenttiniń málimetinshe, «Samuryq-Qazyna» import almastyrý baǵdarlamasy men «offteik sharttar» mehanizmi aiasynda jańa óndirister qurýdy qarastyratyn jobalarǵa kómek kórsetýge daiyn ekenin atap ótti.
«2018 jyly biz qordyń satyp alý júiesin jetildirý boiynsha aýqymdy jumystardy bastap, otandyq taýar óndirýshilerdi qoldaýǵa basymdyq berdik. Nátijesinde holding ishindegi satyp alý 25 ese qysqardy jáne 630 mlrd teńgeden astam qarajat bizdiń kásipkerlerge básekeles ortaǵa berildi. Básekelestik orta qurý arqyly 36 mlrd astam teńge únemdeldi», - dedi Ahmetjan Esimov.
Aita ketken jón, «offteik sharttar» shyǵarýǵa josparlanǵan ónimge aldyn ala tólem jasaý arqyly uzaq merzimdi tapsyrysqa kepildik beredi. Basty shart - elde ónim óndirisiniń bolmaýy jáne oǵan qor kompaniialarynyń qajettiligi.
Qor basshysy Ahmetjan Esimovtiń aitýynsha, qazirgi ýaqytta importty almastyrý baǵdarlamasy aiasynda elimizde jańa óndirister qurý boiynsha qor 27 jobany maquldady, jobalardy iske asyrýǵa bólingen investitsiia kólemi 215 mlrd teńgeden asady, nátijesinde 1 600-den astam jumys orny ashylmaq.
Ol jobalardyń arasynda SQO-nyń eki iri kásiporny – «Petropavl aýyr mashina jasaý zaýyty» AQ (PAMJZ) jáne «S.Kirov atyndaǵy zaýyt» AQ bar. Kezdesý barysynda qordyń qorjyndyq kompaniialary zaýyttarmen 8,5 mlrd astam teńgeniń kelisimsharttaryna qol qoidy.
«PAMJZ» AQ 2,3 mlrd teńgeniń arnaiy tehnikasyn jetkizýi tiis. Al Kirov atyndaǵy zaýytpen 6,2 mlrd teńgeniń ónimine kelisimge qol qoiyldy. Onyń ishinde 3 jylǵa arnalǵan bir uzaq merzimdi kelisimshart bar.
«Búgin biz «Samuryq-Qazynamen» memorandýmǵa qol qoidyq. Onyń aiasynda óńirdi damytýǵa baǵyttalǵan birqatar birqatar júieli sharalar belgilengen. qordyń qoldaýymen Sh.Ýálihanov aýdanyndaǵy shalǵai aýyldardyń birinde uialy bailanys qyzmeti jaqsarady», - dedi oblys ákimi Qumar Aqsaqalov.
Memorandým aiasynda qor SQO-yn TKSh-ny avtomattandyrý, qala qaýipsizdiginiń monitoringin qamtamasyz etý, 2020-2021 jyldary GSM jáne LTE standarttarynyń 25 bazalyq stansasyn iske qosý arqyly «aqyldy» qalalary bar oblys retinde damytatyn bolady.
Budan basqa, áleýmettik saladaǵy jobalar iske asyrylmaq. Onyń ishinde balalardy ońaltý ortalyǵyn qural-jabdyqtarmen jabdyqtaý, meditsinalyq poiyzdyń shalǵai stantsiialarǵa tegin qatynaýy, ámbebap sport oiyn alańdaryn salý jobalary bar.
Shaǵyn jáne orta biznesti damytý baǵytynda 2020 jylǵa poshta jelisi men elektrondyq saýdany keńeitý – SQO-da poshta bailanysynyń 10 seriktes bólimshesin ashý jáne ShOB kásipkerleri úshin elektrondyq saýda negizderi boiynsha seminarlar ótkizý josparlanyp otyr.
