«Samuryq-Qazyna» AQ enshiles kompaniiasy - «Samruk Kazyna Construction» AQ qurylys materialdarynyń importyn almastyrý úshin jańa óndiristerdi iske qosýǵa arnalǵan 23 aýqymdy jobaǵa atsalysady. Jobalar 2022-2024 jyldar aralyǵynda iske qosylyp, 5 300 jańa jumys oryndaryn qurýǵa septigin tigizedi. «Samruk Kazyna Construction» AQ investitsiialyq úlesi shamamen 10%, nemese 39,5 mlrd teńgeni quraidy.
Bul týraly Úkimet otyrysynda «Samuryq-Qazyna» Qorynyń basshysy Almasadam Sátqaliev málimdedi.
Atap aitsaq, shetel seriktesterimen Nur-Sultan qalasynda 5 zaýyt salý kózdelip otyr. Sonyń ishinde qysh sanfaians pen qysh taqtaishalaryn shyǵarý zaýyttary bar.
Investorlardyń kómegimen elorda men Almaty qalalarynda bólmearalyq esikterdi jasaityn qýattylyǵy 500 myń dana bolatyn zaýyt salý, jylyna 660 tys. myń sharshy metr quralatyn temirbeton buiymdaryn shyǵaratyn zaýyt ashý kózdelip otyr.
Almaty oblysynda qýattylyǵy 60 myń tekshe metrdi quraityn gazobeton shyǵaratyn zaýyt, 1,5 mln sharshy metr árleý taqtaishalaryn shyǵaratyn zaýyt salý josparlandy.
Kyzylorda oblysynda qoldanystaǵy karerde jylyna 30-40 mln kirpish shyǵaratyn jáne 100 000 tonna ák shyǵaratyn silikat kirpishi men ák óndiretin zaýyt ashý kózdelgen. Atyraýda polipropilennen buiymdar jasaityn zaýyt iske qosylady. Onyń qýattylyǵy jylyna 15 myń tonna bolady.
Barlyq 23 jobany iske qosý arqyly Qazaqstannyń qurylys materialdary naryǵynda import úlesin edáýir tómendetýge múmkindik beredi. Atap aitsaq, bul zaýyttar tolyq qýatynda jumys istese, shyny maqtasy boiynsha importty almastyrý 90%-ǵa jetedi, sanitarlyq faians boiynsha - 81%-ǵa, árleý materialdary boiynsha - 36%-ǵa, esikter boiynsha - 18%-ǵa, qysh taqtaishalary boiynsha - 11%-ǵa deiin tómendeidi, dedi Almasadam Sátqaliev.
Onyń aitýynsha, qazaqstandyq shikizatty paidalaný arqyly, bul indýstriiadaǵy jergilikti úlesti 80%-ǵa jetkizýge bolady.
