Budan bylai barlyq jobalar ashyq ári konkýrs negizinde halyqaralyq kompaniialardyń qatysýymen júzege asyrylatyn bolady. Bul týraly QR Prezidenti janyndaǵy Sheteldik investorlar keńesiniń kezekten tys otyrysynda Memleket basshysy Qasym-Jomart Toqaev málim etti, dep habarlaidy QazAqparat.
Qazaqstan Prezidenti básekelestikti damytý, sybailas jemqorlyqty joiý, tiimdi memlekettik basqarýdy qurý jáne sapaly adami kapital qalyptastyrý kózdegen maqsatqa jetkizetin jol dep atap ótti. Osyǵan orai Memleket basshysy birqatar ózekti mindetke nazar aýdardy.
Atap aitqanda, Prezident ádil ári beitarap sot júiesi ǵana qýatty ekonomika men laiyqty biznes-klimat qurýdyń negizi ekenine toqtaldy. Investorlardyń zańdy múddeleri men quqyqtaryn qorǵaýdyń basty kepili dál osy bolýǵa tiis. Memleket basshysy investitsiialyq daýlardy sheshý boiynsha Astana halyqaralyq qarjy ortalyǵy men Halyqaralyq arbitraj ortalyǵynyń áleýetin tolyq paidalanýǵa shaqyrdy. Qasym-Jomart Toqaev adal básekelestikti damytý isin jańa baǵyttyń taǵy bir mańyzdy basymdyǵy dep sanaidy.
«Ekonomikanyń negizgi salalaryndaǵy oligopoliialardyń tarihi ústemdigi naryqtar men salalardyń damýyn tejeidi. Bul jaǵdaidy zańnamalyq jáne praktikalyq turǵydan batyl ózgertetin bolamyz. Biyl qol qoiylǵan básekelestikti damytý máselesi jónindegi zańda mańyzdy bastamalar qarastyrylǵan. Bul – naryq sýbektileriniń shekteýli resýstarǵa qoljetimdiligi, naryqqa kirý kedergilerin tómendetý jáne aralas naryqtarǵa monopoliianyń keri áserin joiý.
«Samuryq-Qazyna» qoryn túbegeili qaita qurý jumystary júrip jatyr. Ákimshilik resýrstardyń esebinen tapsyrys alǵan kompaniialar ózderiniń artyqshylyqtary men kelisim-sharttarynan airylýda. Qordyń investitsiialyq jobalarynyń toptamasy – shamamen 3,5 trillion teńge. Budan bylai barlyq jobalar ashyq ári konkýrs negizinde halyqaralyq kompaniialardyń qatysýymen júzege asyrylatyn bolady. Eger, olai bolmai jatsa, birden maǵan tikelei habarlańyzdar. Óitkeni bul – meniń prezidenttik qyzmetimdegi asa mańyzdy is», – dedi Qasym-Jomart Toqaev.
Jiynǵa Prezident Ákimshiliginiń basshylyǵy, Úkimet músheleri, memlekettik organdardyń ókilderi, iri transulttyq jáne ulttyq kompaniialardyń jetekshileri qatysty.
Kezdesýge qatysýshylar adami kapitaldy kúsheitýge, ekonomika men investitsiialyq saiasatqa ekologiialyq, áleýmettik jáne korporativtik basqarýdyń standarttaryn engizýge basa mán bere otyryp, elimizdiń investitsiialyq tartymdylyǵyn jaqsartý jóninde birqatar usynys aitty.
