Ulttyq qaýipsizdik komiteti tóraǵasynyń orynbasary Asqar Ámirhanov Samat Ábishten jaýap alynyp jatqanyn aitty, dep habarlaidy Sputnik Qazaqstan.
Aitýynsha, qańtar oqiǵasy kezinde UQK tóraǵasynyń burynǵy orynbasary Samat Ábish jumysta bolǵan.
"Qazir Samat Ábish te tergeýge alyndy. Odan jaýap alyp jatyr. Ol kúdikti me, kýáger me, statýsyn bilmeimin", - dedi Ámirhanov Májilis kýlýarynda.
Ol Samat Ábishtiń Qazaqstanda ekenin aitty. Biraq ózi ony kórmegen.
"Óz basym ony kórgen joqpyn. Biraq tergeý júrip jatyr, sondyqtan ol osynda bolýǵa mindetti", - dep naqtylady Ámirhanov.
Eske sala keteiik, Ulttyq qaýipsizdik komitetiniń burynǵy basshysy Kárim Másimov jappai tártipsizdikterden keiin 6 qańtarda qyzmetinen bosatyldy. 8 qańtarda onyń ustalǵany belgili boldy. Sondai-aq onyń eki orynbasary – Ánýar Sadyqulov ("A" arnaiy maqsattaǵy qyzmetiniń bastyǵy) men Dáýlet Erǵojin ustaldy.
Artynan Másimovtyń taǵy bir orynbasary Marat Ósipov qamaýǵa alyndy. Al Qazaqstannyń Tuńǵysh Prezidenti Nursultan Nazarbaevtyń nemere inisi Samat Ábish qyzmetinen bosatyldy.
Kúdiktilerge memleketke opasyzdyq jasaý jáne bilikti kúshpen basyp alýǵa nemese Qazaqstannyń konstitýtsiialyq qurylysyn kúshtep ózgertýge baǵyttalǵan áreketterden basqa, "bilikti nemese qyzmettik ókilettikterdi asyra paidalaný" baby boiynsha aiyp taǵylyp otyr. Sosyn para alý faktileri boiynsha tergeý sharalary qolǵa alyndy.
