Foto: Bolat Shaihinov, Sputnik Qazaqstan
Ulttyq qaýipsizdik komiteti tóraǵasynyń burynǵy birinshi orynbasary Samat Ábishke qatysty tergeý bastaldy, dep habarlaidy "Ult aqparat" Bas prokýratýranyń baspasóz qyzmetine silteme jasap.
"Bas prokýratýranyń Arnaiy prokýrorlary Ulttyq qaýipsizdik komiteti tóraǵasynyń burynǵy birinshi orynbasary Samat Ábishke qatysty «qańtar oqiǵalary» kezinde bilik pen laýazymdyq ókilettikterdi asyra paidalaný faktisi boiynsha sotqa deiingi tergep-tekserý júrgizip jatyr.
Tergeý qupiia qujattamanyń edáýir kólemin zerdeleýmen bailanysty.
QR QPK-niń 201-babyna sáikes tergeý múddesinde sotqa deiingi tergep-tekserýdiń ózge de derekteri jariia etilýge jatpaidy" - delingen habarlamada.
Sonymen qatar qadaǵalaý vedomstvosy Konstitýtsiia normalaryna sáikes zań men sot aldynda bári teń ekenin atap ótti.
Tergeý qorytyndysy boiynsha zańdy is júrgizý sheshimi qabyldanatyn bolady.
Aita keteiik, Samat Ábish – Tuńǵysh Prezident Nursultan Nazarbaevtyń nemere inisi. 2015 jyldan bastap qańtar oqiǵasyna deiin, iaǵni 2022 jyldyń qańtaryna deiin Ulttyq qaýipsizdik komiteti tóraǵasynyń birinshi orynbasary qyzmetin atqarǵan.
Esterińizge salaiyq, qańtar oqiǵasynan keiin Ulttyq qaýipsizdik komitetiniń burynǵy tóraǵasy Kárim Másimov pen onyń orynbasarlary ustaldy. Artynsha olarǵa sot úkimi shyqty. Másimov múlki tárkilenip, 18 jylǵa bas bostandyǵynan aiyryldy.
Al Másimovtiń orynbasary bolǵan Samat Ábish qyzmetinen bosatyldy, onyń ústinen qylmystyq is qozǵalǵan joq.
