Samarqanda Qazaqstan Respýblikasynyń bas konsýldyǵynyń resmi ashylý rásimi ótti.
Saltanatty sharaǵa Qazaqstannyń Ózbekstan Respýblikasyndaǵy elshisi Darhan Satybaldy men Samarqan oblysynyń ákimi Erkinjon Týrdimov qatysty, dep habarlaidy "Ult aqparat".
«Samarqanda Qazaqstan Respýblikasynyń bas konsýldyǵynyń ashylýy – bizdiń memleket basshylarynyń ýaǵdalastyǵynyń nátijesi. Búginde Ózbekstan –Qazaqstannyń Ortalyq Aziiadaǵy eń iri saýda seriktesi, onyń úlesine óńir elderimen taýar ainalymynyń jalpy kóleminiń 50%-dan astamy tiesili. Óz kezeginde ózbek biznesi qazaqstandyq naryqty belsendi igerýde. Osynyń barlyǵy memleket basshylary Qasym-Jomart Kemeluly Toqaev pen Shavkat Miromonuly Mirzieevtiń kúsh-jigeriniń, Qazaqstannyń Tuńǵysh Prezidenti – Elbasy Nursultan Ábishuly Nazarbaevtyń arnaiy úles qosýynyń arqasynda jasalyp jatyr», – dedi D. Satybaldy quttyqtaý sózinde.
Qazaqstandyq diplomattyń aitýynsha, Samarqan Ózbekstannyń strategiialyq ortalyǵy sanalady jáne mańyzdy týristik, ekonomikalyq jáne kólik áleýetine ie. Sol sebepti Samarqanda bas konsýldyqtyń ashylýy kezdeisoq emes.
«Aita ketý kerek, Samarqan búginde qazaqstandyq týrister úshin ǵana emes, biznes salasynda da tartymdy ortalyq bolyp otyr. Qalanyń tarihy bai ótkeni, sondai-aq jarqyn bolashaǵy bar. Jýyq arada Samarqan millioner qala mártebesine ie bolady. Bul onyń saiasi mártebesin arttyryp, týristik múmkindikterin keńeitedi, sondai-aq investitsiialyq tartymdylyǵyn kúsheitedi. Samarqan qalasyndaǵy bas konsýldyqtyń qyzmeti Qazaqstan men Ózbekstan arasyndaǵy tatý kórshilik qarym-qatynastardy jandandyrýǵa eleýli úles qosatynyna senimdimin», – dedi Darhan Satybaldy.
Samarqan oblysynyń basshysy E. Týrdimov eki eldiń strategiialyq yntymaqtastyǵyn keńeitý maqsatyna tolyq sáikes keletin qazaqstandyq diplomatiialyq missiiany ashýdyń tarihi mańyzdylyǵyn atap ótti.
«Mundai aitýly oqiǵa tarihymyzda qalatyny sózsiz. Biz Qazaqstannyń Samarqandaǵy bas konsýlyna barynsha qoldaý kórsetemiz. Qazaqstan-Ózbekstan qarym-qatynastarynyń sapaly jańa deńgeide damýy baýyrlas eki halyqtyń uzaq merzimdi dostyq múddelerine tolyq jaýap beretinin jáne Ortalyq Aziia óńirleriniń beibitshilikti, turaqtylyqty, qaýipsizdikti jáne jedel damýyn qamtamasyz etýdiń mańyzdy faktory bolatynyn aitqym keledi», – dedi Samarqan oblysynyń ákimi Erkinjon Týrdimov.
