Biyl úzdik áiel róli úshin Kann kinofestivaliniń júldegeri atanǵan qazaqstandyq aktrisa Samal Eliamova Qazaqstan men Reseidiń XV óńiraralyq yntymaqtastyq forýmy aiasyndaǵy iri týristik kórmege qatysý úshin týǵan qalasy Petropavlǵa keldi. Bul týraly Sputnik Qazaqstan tilshisi habarlady.
Samal Esliamova osy kórmeni erekshe kórgisi kelgenin atap ótti.
"Meni shaqyrǵanyna qýanyshtymyn. Mundai deńgeidegi is-shara alǵash ret ótkizilip otyrǵan týǵan ólkemdi qoldaýǵa árqashan daiynmyn. Bul, shyn máninde, tarihi oqiǵa. Qai elge barsam da: "Qazaqstanǵa kelińizder, ǵajaiyp ári bir-birine múlde uqsamaityn oryndar kóp. Bizdiń elimizdiń ulan-baitaq dalasyna saiahattańyzdar, sonda onyń san alýan ekenin kózben kórip, sezinesizder" dep aityp júremin", — degen Esliamova forým óte jaqsy nátije berip, Qazaqstan týrister úshin odan da tartymdy bola túsetinine senim bildirdi.
Sonymen qatar, aktrisa janǵa jaily Petropavldy qatty jaqsy kóretinin aitty.
"Óz boiaýy, óz ereksheligi bar… Bul ortany umytý múmkin emes", — dep túiindedi ol.
Esterińizge sala keteiik, qazaqstandyq aktrisa Samal Esliamova biyl "Aika" filmindegi róli úshin Kann kinofestivalinde marapat aldy. Sonymen qatar, ol Antaliiadaǵy 55-shi halyqaralyq kinofestivalde "Úzdik aktrisa" nominatsiiasyn ielendi.
Rejisser Sergei Dvortsevoidyń "Aika" filmi Qazaqstan atynan "Oskar" kinojúldesine usynyldy.
