Astanada Qýandyq Bishimbaev isine qatysty sot otyrysy jalǵasyp jatyr. Sotqa Saltanat Núkenovanyń qurbysy Aida Ahmedina kelip, qurbysynyń jeke ómiri jaily bólisken qupiialaryn tolyq aityp berdi.
Ahmedinanyń aitýynsha, Núkenova áiel retinde tyrnaǵyn jasatýǵa óz betimen shyǵa almaityn bolǵan. Birde Qýandyq Bishimbaev ony kútip otyryp, tyrnaq jasatýdyń uzaqtyǵyna shaǵymdanyp, urys týyndaǵan. Sodan beri Núkenova tyrnaq jasatýǵa da shyqpaityn bolǵanyn qurbysyna aitypty, dep habarlaidy "Ult aqparat".
«Saltanat onyń jumysqa barmai, janynda 24/7 birge bolatynyn aitty. Ol jumysqa barmaǵandyqtan bar nazaryn Saltanatqa baǵyttaidy. Ol sóileskisi kelip, túnimen uiyqtatpaityn kórinedi. Sál urys-keris bolsa, syilyqtaryn laqtyryp jiberedi. Jańa jyldyń aldynda oǵan qymbat saǵat syilady. Kishkene janjalda ony terezeden laqtyryp jiberdi, sodan keiin olar ony izdep taba almady. Ol «tipti manikiýr jasai almaimyn» dedi. Sońǵy ret tyrnaǵyn jasatýǵa barǵanda, zalda Qýandyq kútip otyrǵanyn aitty. Bishimbaev manikiýrdiń uzaqqa sozylǵanyna ashýlanǵan soń, ony da aiaqtamai, ketip qaldy», - dedi sotta Saltanattyń qurbysy.
Núkenova kúieýi betin kógertip urǵannan keiin aǵasyna foto jiberip basy bálege qalǵan. Sonyń qarymtasy retinde Bishimbaev odan tyrdai jalańashtanyp, video túsirip berýin talap etipti. Al, marqum onyń talabyn oryndapty.
«Sáýirde otbasymmen demalysqa kettim. Demalystyń birinshi kúni túnde Saltanattyń habarlamalarynan oiandym. Ol qatty qorqyp turdy: «maǵan advokat kerek, men bárine daiyn bolýym kerek. Ol meni uryp-soqty, Aitymǵa sýretterimdi jiberdim. Ol kelip, Qýandyq ekeýi tóbelesti. Odan birneshe ret ketkim kelgen. Ol «otbasyńda meniń seni uryp-soqqanymdy dáleldeitin sýretter bar, keiin maǵan qoqan-loqqy jasaisyńdar, men seni jibermeimin. Kepildik retinde sen maǵan jalańash kúide video túsirip berýiń kerek» dep aitty dedi. Men odan «Sen onyń aitqanyn oryndadyń ba?» dep suraǵanymda, ol «iá, istedim, basqa amalym bolmady» dep jaýap berdi», - dedi búgingi sot otyrysynda Núkenovanyń qurbysy Aida Ahmedina.
