Radikaldy dini kózqarasty ustanǵan almatylyq óziniń ógei balasyna qysym kórsetken. Oiyn balasyn oqýdan shettetip, Islam dinin qabyldaýǵa májbúrlegen jat aǵym ókili - jetkinshekke kopiýter men túrli gadjetterdi qoldanýǵa tyiym salǵan. Tipti, sýret salyp, án tyńdaýǵa ruqsat bermegen. Osy áreketterdiń barlyǵyn «haram» dep, buǵanasy bekimegen balany erkindiginen aiyrǵan. Órimdei balanyń anasy da jat aǵymnyń jeteginde ketken jigittiń sózin sóilep, aqyr sońynda óz balasyn ózekten teýipti. Anyqtalǵany - balasynan bas tartqan ana salafizm aǵymyna ilesken jigittiń altynshy áieli atanǵan. Bul týraly "Almaty" telearnasynyń jańalyqtar toptamasynda aityldy.
Júzin jasyryp, atyn atamaýdy ótingen bala qazir jetinshi synypta oqidy. Biraq osydan 2 jarym jyl buryn sabaqqa den qoiýdy múldem umytqan. Týǵan anasy jat aǵymnyń jeteginde ketken jigitke erip, 6-shy áieli bolýǵa kelisipti. Osydan keiin, "saqaldy" ógei áke órimdei balanyń berekesin qashyrady. Jap-jaqsy oqyp júrgen jetkinshek az ýaqytta kúrt ózgerip sala bergen.
Órimdei balanyń anasy qazir hidja, kiip, namaz oqidy. Buryn hristian dininde júrgen kelinshek qaba saqal ósirgen jigitpen tanysqan kúnnen bastap, onyń shyrmaýynan shyǵa almapty. Ógei ákeden ábden qorlyq kórgen bala anasynan qaiyr bolmaǵan soń, óz ákesine habarlasyp, arasha túsýin ótinedi. Osydan keiin, jábirlenýshi tarap quzyrly oryndarǵa shaǵymdanǵan eken.
"Shańyraq" ortalyǵynyń dintanýshylary arnaiy ózderiniń ádisterimen anyqtady. Testileý júrgizdi, túrli suraqtar qoidy. Osy arqyly onyń qazirgi kezde kóp másele týdyryp júrgen teris dini aǵymnyń belsendi múshesi ekendigi týraly qorytyndy shyǵardyq", - dedi Almaty qalasy Din isteri basqarmasynyń basshysy Aidar Esenbekov.
Ózderinen ózgeni haram sanaityn teris aǵym ókilderi osy oqiǵadan keiin "Shańyraq" ońaltý ortalyǵynyń mamandarymen tildesken. Dintanýshylar adasqandardy raiynan qaitarýǵa tyrysypty. Biraq mámilege kelýden bas tartqan olar órimdei balany kerek etpeitinderin anyq bildirgen.
Anasynyń serigi kórsetken qysymǵa shydamaǵan bala qazir óz ákesimen birge turady. Aýdandyq sot jetkinshekti ákesine berýdi uiǵarypty. Al kámelet jasyna tolmaǵan órenge ózeýregen salafittiń isimen endi quzyrly organdar ainalysady. Qazir kúdikti tek jat aǵym ókili retinde tirkeýge alynypty. Al sanasy shyrmalýǵa shaq qalǵan balanyń ákesi - bul oqiǵa kópke sabaq bolsa eken deidi.
Anyqtalǵany - balany teris aǵymǵa itermelegen kúdikti salafitterdiń ishindegi mathalitterdiń qatarynan eken. Ol Saýd Arabiiasynda keńinen tanylǵan Nazratýlla Ábdiqadyrov men Mahmad Dilmýradtardyń ýaǵyzyn tyńdaǵan bolýy kerek. Byltyrǵy jyly bir ǵana Almatyda teris aǵym ustanǵan 570 adam anyqtalǵan eken. Dintanýshylardyń yqpalymen olardyń jartysyna jýyǵy dástúrli din jolyna túsken.
