Almatylyq kelinshek Áigerim radikal salafit aǵymyndaǵy kúieýimen turǵan 11 jylda ne kórgenin aityp berdi. Ol jastaiynan ata-anasynyń erkelep ósken jalǵyz qyzy bolǵan. Ómirinde áke-sheshesi betinen qaqpaǵan qyz óz degenin istetetin erke bolyp ósti.
Boijetip, oqýyn bitirgen kezde Armanmen tanysady. Arman óte tuiyq, birtoǵa jigit edi, namaz oqityn, azdap saqal qoiatyn. Áigerimniń ata-anasy basynda munysyn jaratpady.
Keiin qyzynyń mineziniń shálkestiginen amal joq kelisedi. Biraq ekeýiniń toiy bolmady. Sebebi oǵan Arman qarsy boldy.
«Men oǵan kúieýge shyqqanda radikal salafit ekenin bilmedim. Birtindep mineziniń múlde tuiyqtalyp bara jatqanyn baiqadym. Bizdiń úige qonaq kelmeitin. Eshkimdi tanymaitynmyn. Úide men aqsha tabatynmyn. Ol namazhan dostaryn aralap qur júretin. Jeńildiń ústimen, aýyrdyń astymen ómir súrgisi keldi. Qyzym ekeýmizdi asyraýdy múlde oilamaityn. Birese, óziniń jaqtastarymen saýdaǵa shyǵatyn, bolmasa úide jatatyn», - dedi Áigerim.
Áigerimge anasy, baýyrlary aqshalai, zattai kómektesip turǵan. Bir jylda jas otbasy birneshe ret páter aýystyrǵan.
«Musylmandarda áieldi alǵan soń asyraý paryz edi ǵoi. Bizde olai bolmaityn. Men dárihanada istedim. Keide táýlik boiy jumys istedim. Sonda kúieýim dárihanaǵa kelip, meni kúzetip otyratyn. Qojaiyn kelgen kezde aqshamdy alyp ketetin. Jaǵdaiymyz óte nashar boldy. Jazdygúni maǵan qolǵap kigizetin. OLH-ten tegin zat izdep júretinbiz. Báleniń bári qyzym mektepke barǵanda bastaldy. Qyzdy mektepke jibergisi kelmeitin. Óitkeni ánuran aitqanyn qalamaityn. Qyzym sabaǵynan jii qalatyn boldy. Keiin baliǵat jasyna jetip qalǵanda májbúrlep oramal taqqyzdy. Baliǵatyna tolǵan soń kúieýge berem dedi. Bizdiń eldiń zańyna baǵynǵysy kelmedi. Qazaqstanda 18 jasqa tolmaǵan adam nekege tura almaidy»,- dedi kelinshek.
Áigerimniń 9 jasynda oramal taqqan qyzynyń júikesi toza bastady. Túnde qarańǵylyqtan qorqady. Barlyq jerde ákesi aityp qoiǵan shaitan elesteitin.
«Tún ishinde shaitan kirip jatyr dep shoshyp oianatyn. Qyzymdy psihikalyq densaýlyq ortalyǵynda jatqyzýyma týra keldi», - dedi ol.
Áigerim óziniń salafit aǵymyndaǵy jigitke kúieýge shyqqanyna ókinedi. Qyzynyń densaýlyǵy úshin alańdaidy.
Bul oqiǵaǵa qatysty Almatydaǵy Zaria Vostoka meshitiniń imamy Qazbek Ahmetov mynadai túsinik berdi.
«Halyqtyń arasynda azamattyq neke kóbeiip ketti. Bul - oń úrdis emes. Qazaqstannyń ádilet organdarynda nekesin tirkeý eki adamǵa da jaýapkershilik júkteidi. Al azamattyq nekede destrýktivti dini aǵym ókilderi úshin esh jaýapkershilik joq. Olar 3 ret talaq aityp kete beredi. Al jas áielder ne múlki joq, ne alimenti joq ortada qalady. Qazir QMDB bul protseske jaýapkershilikpen qarai bastady. Meshit imamdaryna neke kýáliginsiz neke qiiýǵa tyiym saldy. Nemese eki taraptyń da ata-anasy qatysýy talap etiledi. Paiǵambarymyz (s.ǵ.s) ajyrasýǵa qarsy bolǵan», - dedi meshit imamy.
