Búgin «Amanat» partiiasy Túrkistan oblystyq filialy janyndaǵy «Miras» azamattyq qoǵam men mádenietti damytý jónindegi Qoǵamdyq keńesiniń kezekti otyrysy ótti, dep habarlaidy «Ult aqparat» «Amanat» partiiasy Túrkistan oblystyq filialynyń baspasóz qyzmetine silteme jasap.
Dóńgelek ústel basynda keńes músheleri oblys aýmaǵyndaǵy tarihi-mádeni oryndardyń jai-kúii jáne animatsiialyq filmderdiń sapasyn arttyrý máselesin talqylady. Jiynnyń moderatorlyq tizginin alǵan keńes tóraǵasy Qalyima Jantóreeva balalarǵa arnalǵan animatsiialyq filmderdi túsirý toqtap turǵanyn aitty.
«Buǵan deiin oblystyq mádeniet basqarmasyna qarasty «Ońtústikfilm» mekemesi «Saq» kinostýdiiasymen birlese otyryp birneshe tarihi animatsiialyq filmdi kórermen nazaryna usynǵan bolatyn. Alaida, qazir qarjy tapshylyǵyna bailanysty túsirý jaǵy toqtap tur. Oǵan qosa, kún tártibindegi taǵy bir másele Balaqorǵan jáne Qyzqorǵan tarihi eskertkishterin memlekettik qorǵaýǵa alý jaiyn kóterýdemiz. Osy rette atalǵan máselelerdiń kúrmeýin sheshý maqsatynda qoǵamdyq keńes músheleriniń basyn qosyp otyrmyz», – deidi ol.
Jiynda sóz alǵan oblystyq mádeniet basqarma basshysynyń orynbasary A.Temirhan eki máselege de toqtalyp, habarlama jasady. Aitýynsha, «Saq» kinostýdiiasy túrki halyqtary úshin erekshe mańyzǵa ie ári tarihi tulǵa Q.A.Iasaýidiń ómirin keńinen nasihattaýǵa arnalǵan birneshe joba usynǵan. Eger qarjylai qoldaý tapqan jaǵdaida kinostýdiia talapqa sai týyndylar ázirleýge daiyn. Atap aitqanda, «Iassy qupiialary» atty 10 seriialy animatsiialyq filminiń joba quny – 150 000,0 teńge. Al, «100 ańyz» atty 5 bólimnen turatyn mýltfilmge 75 000,0 teńge qajet.
Sonymen qatar, basqarma basshysynyń orynbasary Balaqorǵan jáne Qyzqorǵan bekinisteri memlekettik tizimdegi eskertkishtermen birdei qorǵaýǵa alynǵanyn málimdedi. Atalǵan tarihi mekenderge saraptama júrgizilip, oblys ákiminiń qaýlysymen jergilikti mańyzy bar eskertkishter qataryna engizý josparlanýda.
Keńeste «Saq» kinostýdiiasynyń direktory N.Patteev Túrki dúniesiniń astanasy – Túrkistan shaharyn nasihattaýǵa baǵyttalǵan jobalar men usynystaryn jetkizdi.
«Jas urpaq Eýropany qospaǵanda, kórshi Reseidiń mýlfilmderin tamashalap ósip jatqany jasyryn emes. Bul qubylys eldigimizge keri áserin tigizeri anyq. Osy oraida bizdiń kinostýdiia birneshe jyldan beri balalarǵa kóptegen mýltfilm tartý etip keledi. Olar tek jergilikti ǵana emes respýblikalyq telearnalarda da kórsetildi. Jýyrda Túrkistanda «100 ańyz» atty kitap jaryq kórdi. Osy kitaptyń jelisi negizinde animatsiialyq film daiyndaýdy qolǵa alýdamyz», – dedi N.Isauly.
Otyrys sońynda keńes músheleri máselelerdi jan-jaqty talqylap, aitylǵan birqatar usynysty nazarǵa aldy. Oblysymyzdyń ár túkpirindegi tarihi jádigerler jaily málimetter jinaqtaýǵa jáne olardy qorǵaýǵa alý boiynsha tiisti jumystar júrgizýge ýaǵdalasty.
