Almaty ákimi Baqytjan Saǵyntaev jumys sapary barysynda Jetisý aýdanyn abattandyrý men kógaldandyrý jumystarymen tanysty, dep habarlaidy "Ult aqparat".
Qala ákimi «Kókjiek» jáne «Kókmaisa» shaǵynaýdandaryndaǵy skverlerde, Qazybaev kóshesindegi jaiaý júrginshiler aimaǵynda, №169 jáne №171 balabaqshalarda júrgizilip jatqan jóndeý jumystarynyń sapasyna baǵa berdi.
Abattandyrý jáne kógaldandyrý jumystary – qala ákimimen ótetin kezdesýlerde turǵyndardyń jii kóteretin máseleleriniń biri.
Baqytjan Saǵyntaev qala turǵyndarynyń demalysy men ekologiiany saýyqtyrý úshin qolaily jaǵdai jasaý qajettigine nazar aýdardy. Jetisý aýdanynda kóptegen qoimalar, ónerkásiptik kásiporyndar ornalasqan.
Osyǵan orai, turǵyndardyń ótinishterine sáikes, kógaldandyrý jáne belsendi demalýǵa arnalǵan oryn jasaý qolǵa alyndy. Eger byltyr 7 skver men 1 saiabaq aýdan turǵyndarynyń igiligine berilse, biyl 12 skverdi abattandyrý josparlanyp otyr.
Baqytjan Saǵyntaev rekreatsiialyq aimaqtardy ǵana emes, sondai-aq oǵan irgeles aýmaqtarǵa da kóńil bólýdi, retke keltirýdi tapsyrdy.
«Turǵyndardyń suranystaryna sáikes ómir súrý, nátijeli jumys jáne belsendi demalys úshin jaǵdaidy jaqsartýdy jalǵastyramyz. Bul erekshe mikroklimat qalalyqtardyń ómir súrýi men kóńil-kúiine oń áser etedi», - dedi qala ákimi.
Jańa jobalardy qaraý kezinde Jetisý aýdanynyń ákimi Maqsat Qiqymov qala ákiminiń Jasyl Almaty bastamasyn júzege asyrý aiasynda jasyl jelek qorynyń jaǵdaiyn jaqsartý úshin millionǵa jýyq aǵash otyrǵyzylatynyn aitty.
«Aýdanda 220 myń aǵash bar. Onyń 5 myńy sońǵy 3 jylda otyrǵyzyldy. Tekserý nátijesinde byltyr otyrǵyzylǵan 1 myńǵa jýyq kóshettiń óspei qalǵany anyqtaldy. Sondyqtan kelisimshart talaptaryna sáikes merdiger uiymdar kúzde 2 myń kóshet otyrǵyzady. Sonymen qatar, Jasyl Almaty baǵdarlamasy aiasynda kúzde Jetisý aýdanynda taǵy 20 myń aǵash otyrǵyzylyp, 12 gúlzar abattandyrylady», - delingen qalalyq ákimdiktiń baspasóz qyzmeti taratqan habarlamada.
Jalpy Jetisý aýdanynda 2019 jyly aýla aýmaqtaryn jaryqtandyrý jumystary 60%-dan 88%-ǵa deiin oryndaldy. Biyl bul jumystyń kórsetkishin 100% jetkizý josparlanyp otyr.
