Jastardyń qazaqstandyq ónim shyǵarýyna bóget bolmaý qajet. Bul týraly búgin «Digital Bridge» halyqaralyq innovatsiialyq forýmda QR Premer-Ministri Baqytjan Saǵyntaev aitty, dep habarlaidy "Ult aqparat" QazAqparat agenttigine silteme jasap.
«Qazaqstan halqynyń 50 paiyzy - Táýelsizdik jyldarynda dúniege kelgen adamdar. Jaqynda, 16 jeltoqsanda Qazaqstan táýelsizdigine 27 jyl tolady. Bob Dorf: «Jastar eldiń bolashaǵy. Olar osy jerde qalýy, óz elderine oralýy tiis. Al biz, aǵa býyn ókilderi olar úshin barlyǵyn daiyndaýǵa tiispiz» degen edi. Olar eshqaida ketken joq! Olar ózderi ómir súrgisi keletin eldi, gúldengen, tsifrlandyrǵan Qazaqstandy jasap jatyr. Menińshe, bizdiń mindetimiz olarǵa bóget bolmai barlyq jaǵdailaryn jasaý. Úkimettiń, Parlamenttiń búkil saiasaty zańnamalyq baza ázirlep, olardyń oilaǵan dúnielerin jasaýǵa múmkindik berý», - dedi Baqytjan Saǵyntaev.
Sonymen qatar Úkimet basshysy jas biznesmenderge óz ónimderin jasaýǵa zor tabystar tiledi.
«Biz Qazaqstanda jasalǵan ónimniń bolǵanyn, keiin Qazaqstanda jasalǵan jaǵdaidyń arqasynda dep aitqanyn qalaimyz. Barlyq jastarǵa tabys tileimin. Bul bastamasy ǵana. Menińshe, jii kezdesip, talqylap otyramyz dep oilaimyn. Kelesi jyly biz shyn máninde Qazaqstanda múldem basqa deńgeide kóretin bolamyz», - dedi Premer-Ministr.
