Almaty ákimi Baqytjan Saǵyntaev Alataý aýdany ákiminiń eseptik kezdesýine qatysty, dep habarlaidy "Ult aqparat".
Aýdan turǵyndaryn alańdatatyn basty máseleler – joldyń, kommýnaldyq jelilerdiń joqtyǵy, abattandyrý men aýmaqty kógaldandyrý jumystary.
Alataý aýdanynyń ákimi Azamat Qaldybekov turǵyndarǵa 2019 jyly atqarylǵan jumystardy baiandap berdi.
Ótken jyly «Mádeniet» yqshamaýdany men «Energostroitel», «Teploenergetik» saiabaqtaryna 6,8 shaqyrym gaz qubyry tartyldy. 1407 úidi gazdandyrý qajet, olardyń 976-y jeke úi, 431-i saiabaq.
Sýmen qamtý 79% káriz jelileri 68 %–dy quraidy. «Aqbulaq», «AZTM», «Alǵabas» yqshamaýdandaryna uzyndyǵy 107 shaqyrym bolatyn jeliler tartylyp jatyr.
Aýdan elektr jelisimen tolyq qamtylǵan. Degenmen 157 shaqyrym jeli men transformatorly qosalqy stansalar sot arqyly iesiz dep tanylyp, onyń 143 shaqyrymy «Alataý Jaryq» kompaniiasynyń balansyna berildi. Aita keterligi, aýdan turǵyndary kommýnaldyq qyzmet tólemin jalpyqalalyq tarif boiynsha tólei alady.
Eseptik kezdesý barysynda turǵyndar tarapynan usynys– tilekter de aityldy. Máselen, ekolog Timýr Eleýsizov skverlerdi abattandyrý boiynsha kómegin usyndy, sonymen qatar videobaqylaý kameralaryn ornatý qajet ekenin atap ótti.
Almaty ákimi Baqytjan Saǵyntaev Alataý aýdany turǵyndarynyń suraqtaryna jaýap berdi. Barlyq problemalyq máselelerdiń júieli túrde sheshiletinin habarlady. Ol úshin taiaý ýaqytta aýdandar ákimderi óz aýmaqtaryn damytýdyń úsh jyldyq sheberlik-josparlaryn ázirleitin bolady.
«Mundai infraqurylymdy jaqsartatyn jáne aýdannyń basqa da máselelerin sheshetin «Jol kartasy» sizderdiń belsendi qatysýlaryńyz arqyly ázirlenedi. Qala biýdjeti sheberlik-josparlaryna sáikes jasalady ári bólinetin bolady», — dedi B. Saǵyntaev. Ol ákimdiktiń jumysynda turǵyndar pikirleriniń basty nazarǵa alynatynyn atap ótti.
Kezdesý aiaqtalǵan soń aýdan turǵyny Jumaǵazy Esjanovtyń ótinishi boiynsha Almaty ákimi asfalty, jaryǵy joq, aryq júiesi buzylǵan Dospanov pen Suhambaev kósheleriniń qiylysyna bardy. Mundaǵy aǵashtardy kesý qajet, óitkeni olardyń butaqtary elektr jelisi men bailanysqa ziian keltirýi múmkin ekendigi aityldy.
Baqytjan Saǵyntaev tiisti basqarmalar basshylaryna jumys josparlaryna sai kórsetilgen kemshilikterdi joiýdy tapsyrdy.
Aitar bolsaq, ótinishterge jedel nazar aýdarý úshin Alataý aýdanynda Whatsapp messendjerinde +7 700 300 2097 nómiri boiynsha chat ashylǵan.
