Búgin Astanada Táýelsiz Memleketter Dostastyǵy Úkimet basshylary keńesiniń otyrysy aiasynda Qazaqstan Respýblikasynyń Premer-Ministri Baqytjan Saǵyntaev Ázerbaijan Respýblikasynyń Premer-Ministri Novrýz Ismail oglý Mamedovpen jáne Armeniia Respýblikasynyń Birinshi Vitse-Premeri Ararat Mirzoianmen ekijaqty kezdesýler ótkizdi.
Ázerbaijan Respýblikasynyń Premer-Ministri Novrýz Ismail oglý Mamedovpen ekijaqty kezdesý barysynda aýyl sharýashylyǵy, energetika, kólik jáne logistika, azyq-túlik jáne metallýrgiia ónerkásibi, farmatsevtika salasyndaǵy ekijaqty saýda-ekonomikalyq yntymaqtastyqty odan ári nyǵaitý, sondai-aq indýstriialandyrý jáne aqparattyq tehnologiialardy damytý salasyn qosa alǵanda, investitsiialyq jobalardy birlesip júzege asyrý máseleleri talqylandy.
Biyl elder arasynda saýda-ekonomikalyq yntymaqtastyqtyń oń qarqyny baiqalady. Buǵan 2017 jyly eki Memleket basshylary kezdesýiniń qorytyndysy boiynsha qolǵa alynǵan eksportty damytý jáne taýar ainalymyn ulǵaitý maqsatynda atqarylyp jatqan belsendi birlesken jumystar yqpal etti. Sonymen qatar, saýda-sattyq, energetika, aýyl sharýashylyǵy, kólik, logistika jáne t.b. salalardaǵy naqty sharalardy qarastyratyn, QR men ÁR arasyndaǵy 2017–2020 jyldarǵa arnalǵan saýda-ekonomikalyq yntymaqtastyqty keńeitý jónindegi Jol kartasyn iske asyrý men ekijaqty Úkimetaralyq komissiia mańyzdy ról atqarady.
Biyl qarasha–jeltoqsan ailarynda Bakýde mádeni qatynastar salasyndaǵy kelisimderdi júzege asyrý maqsatynda Ázerbaijandaǵy Qazaqstan mádenietiniń kúnderin ótkizý josparlanǵan.
2018 jyldyń 8 aiynda Qazaqstan men Ázerbaijan arasyndaǵy taýar ainalymy $168,1 mln qurap, ótken jyldyń sáikes kezeńimen salystyrǵanda 2,1 ese ósti ($81,5 mln). Ázerbaijanǵa eksport kólemi 2,2 esege ósip, $134,6 mln qurady, al import $33,5 mln qurady. Osy jyldyń 8 aiynda Qazaqstannyń porttary arqyly Ázerbaijan baǵytynda 1,3 mln tonnaǵa jýyq júk aýystyryp tieldi. Aqtaý porty — 202 myń tonna nemese 2017 jyldyń osyndai kezeńindegi kórsetkishtiń 32% (624 myń tonna); Quryq porty — 1141 myń tonna, bul ótken jylǵy kórsetkishten 66%-ǵa joǵary (756 myń tonna).
Armeniia Respýblikasynyń Birinshi Vitse-Premeri Ararat Mirzoianmen kezdesýde energetika, mádeni-gýmanitarlyq salalardaǵy, sondai-aq himiia ónerkásibi, azamattyq aviatsiia, mashina jasaý jáne AT-salasynda birlesken investitsiialyq jobalardy iske asyrý salasynda eki eldiń saýda-ekonomikalyq yntymaqtastyǵyn keńeitý máseleleri talqylandy.
Armeniiaǵa metaldar men olardan jasalǵan buiymdardy, azyq-túlik taýarlaryn, mal jáne ósimdik ónimderin, temirjol mashinasyn jasaý ónimderin jetkizý perspektivalary qaraldy.
Taraptardyń pikirinshe, búgingi tańda elder arasyndaǵy ózara tiimdi ekonomikalyq yntymaqtastyqty damytýǵa barlyq jaǵdai jasalǵan. Saýda-ekonomikalyq yntymaqtastyq jónindegi úkimetaralyq komissiia belsendi túrde jumys istep jatyr.
Budan ózge, kezdesýge qatysýshylar aqparattyq tehnologiialardy damytýǵa degen ortaq umtylys naryqtyq ekonomika men ádil básekelestik qaǵidattaryna negizdelgen Qazaqstan–Armeniia biznesin damytýǵa ózara tiimdi jaǵdailar jasaitynyn atap ótti.
Áńgimelesý barysynda aimaqtyq qaýipsizdik jáne terrorizmge qarsy kúres máselelerine erekshe kóńil bólindi.
2018 jyldyń qańtar–tamyz ailarynda Qazaqstan men Armeniia arasyndaǵy saýda ainalymy 2017 jyldyń sáikes kezeńimen salystyrǵanda eki esege jýyq ulǵaiyp, $8,2 mln qurady, al eksport — $4,2 mln.
