Búgin Premer-Ministr Baqytjan Saǵyntaevtyń tóraǵalyǵymen ótken Úkimet otyrysynda «Nurly jer» Turǵyn úi qurylysy baǵdarlamasyn iske asyrýdyń alǵashqy jylynyń qorytyndysy jasaldy, dep habarlaidy "Ult aqparat" primeminister.kz portalyna silteme jasap.
Investitsiialar jáne damý ministri Jeńis Qasymbektiń málimetine sáikes jalpy turǵyn úidi paidalanýǵa berý Baǵdarlamanyń jyldyq josparyna 111% oryndaldy. Barlyǵy 100,8 myń turǵyn úi salyndy.
Premer-Ministr Baqytjan Saǵyntaev «Nurly jer» memlekettik baǵdarlamasyn iske asyrýdyń alǵashqy jyly jaqsy nátije kórsetkenin aitty.
«Memleket tarihynda alǵash ret 11 mln m² astam turǵyn úi paidalanýǵa berildi. Oǵan Memleket basshysy bastamashy bolǵan Memlekettik baǵdarlamanyń arqasynda qol jetkizildi», — dedi Baqytjan Saǵyntaev. Mundai kórsetkishter Qazaqstan Táýelsizdiginiń 26 jylynda baiqalmaǵan bolatyn.
Premer-Ministr statistika, qabyldaý-tapsyrý aktilerin ýaqytyly tapsyrmaý jáne t.b. qatysty problemalar halyqqa túsiniksiz — bul memlekettik organdardyń quzyrettilikterine jatatynyn basa aitty.
«Biyl jumys barysynda mundai olqylyqtarǵa jol bermeimiz dep oilaimyn. Onyń ústine biylǵy Joldaýda Memleket basshysy 2030 jylǵa qarai bir adamǵa 30 m2 (eskertý – turǵyn úi) deiin jetkizýdi mindettedi, al bul jyl saiyn 10% deiingi ósim», — dep atap ótti Baqytjan Saǵyntaev.
Osylaisha, 2018 jyly «Nurly jer» memlekettik baǵdarlamasyn iske asyrý kórsetkishteri aǵymdaǵy kólemderden bir million sharshy metr turǵyn úige asyp túsýi tiis.
«Qurmetti áriptester, kúsh-jigerlerińizdi jinap, biylǵy jyldy da joǵary deńgeide qorytyndylaýdy jáne Elbasymyzdyń barlyq tapsyrmalaryn oryndaýdy suraimyn», — dep túiindedi QR Premer-Ministri Baqytjan Saǵyntaev.
