QR Ishki ister ministrligi aqparattyq turǵydan ashyq bolýy qajet. Bul týraly búgin Úkimettiń selektorlyq rejimdegi otyrysynda Premer-Ministr Baqytjan Saǵyntaev aitty, dep habarlaidy QazAqparat tilshisi.
«Egerde biz halyqtyń aldyna shyǵyp, jasaǵan jumysymyzdaǵy kemshilikterdiń negizi halyqtyń ósýinen, bolmasa páterlerdiń kóp salynýynan dep aitar bolsaq, onda eshkim túsinbeidi. Onda, aldyn ala josparlaiyq. Mysaly, biyl 12 millionnan astam tekshe metr úi salyndy delik. Onda Qalmuhanbet Nurmuhanbetuly (Ishki ister ministri - avt) turǵyzylatyn úi sany 10 paiyzǵa ósti, iaǵni qylmystyń sany pálenshe paiyzǵa ósedi dep aldyn ala josparlaidy. Meniń oiymsha, bul durys emes. Páterdi kóp saldyq, sondyqtan qylmys kóbeidi, avtokólikti kóp satyp alǵandyqtan kólik urlyǵy órshidi deitin bolsaq, onda biz ne jumyspen ainalysamyz?»,- dep atap ótti Úkimet basshysy.
Sondyqtan Baqytjan Saǵyntaev ákimderge quqyqbuzýshylyqtardyń profilaktikasy jónindegi vedomstvoaralyq komissiia otyrystaryn ótkizip, óńirlerdegi problemalardy qarastyrýdy jáne qoǵamdyq qaýipsizdikti aitarlyqtai nyǵaitýǵa yqpal etetin sharalardy qabyldaýdy tapsyrdy.
«Ishki ister ministrligi aqparattyq turǵydan ashyq bolýy qajet. Qylmysqa qarsy kúres, tolqynys týdyrǵan qylmystardy tergep-tekserý, qoǵamdyq qaýipsizdik máseleleri boiynsha IIM-niń baspasóz ortalyǵynda jaýapty tulǵalar júieli túrde brifing ótkizip turýy qajet. Sonymen qatar qoǵamdyq keńes jumysyn jandandyrýymyz tiis. Osyny sizge tapsyramyn. Kelesi jyly bul suraqty qaita qaraý úshin Úkimet otyrysyna shyǵaratyn bolamyz»,- dedi Premer-Ministr Ishki ister ministri Qalmuhanbet Qasymovqa qarata.
