Búgin Úkimet otyrysynda jergilikti politsiia qyzmeti týraly aityldy. Osy oraida Premer-ministr jergilikti organ basshylaryn suraqtyń astyna aldy. Onyń ishinde adam ómirine «jeńil» qaraǵan Atyraý oblysy IID bastyǵy Aian Dúisembaev ministr synyna ilikti, dep habarlaidy Baq.kz tilshisi.
Atyraý oblysy IID bastyǵy Aian Dúisembaev óńirdegi politsiia qyzmeti men qylmystar sany týraly esep berdi. Sodan soń Úkimet basshysy suraq qoidy.
«Ministrińiz qazir ǵana 10% vakansiia qysqartylyp, qarjy kólemi ailyq kóterýge jumsalady dep aityp ótti. Siz jetpeidi dep aitasyz jetpeidi. Vakansiiańyzdyń bárin qysqartyp tastasa, sonda qalai jumys isteisiz sonda?» - dep surady Baqytjan Saǵyntaev.
Dúisembaev bolsa qysqartqan jaǵdaida qyzmetkerlerdiń jalaqysyn kóbeitetinin aitty.
«Shamamyz bar. Ministrlik sheshimi qandai bolady, biz qoldaimyz. Sáikes jumys isteimiz», - dedi ol.
Premer-ministri jergilikti organ basshysynyń jaýabyna qanaǵattanbai jaýabyn tolyqtyrýdy surady.
«Ministrdiń sheshimi qalai bolady, durys, áskeri adam ǵoi endi. Aqsha berse qylmysty toqtatamyz. Aqsha bermese, ailyq kótermese qylmyspen kúrespeimiz, sizdiń jaýabyńyz solai», - dedi Úkimet basshysy.
Atyraý oblysy IID bastyǵy óńirdegi qylmys sanyn «qatty ósip turǵan jaǵdai» emes dep túsindirdi.
«Byltyr 25 adam ólgen, biyl 26 adam óldi dep adam ómirine túsiniksiz qaraisyz. Bir adam bolsa da ol – adamnyń ómiri. Bulai jeńil qaraýǵa bolmaidy», - dep synady Saǵyntaev.
