Almaty ákimi Baqytjan Saǵyntaev Ortalyq kommýnikatsiialar qyzmetinde ótken brifing barysynda júrdek avtobýstar jelisi (BRT) men júrdek tramvai (LRT) jelisin salý týraly aitty, dep habarlaidy QazAqparat.
«BRT jelisine kelsek, onyń marshrýty belgili. Timiriazev pen Jeltoqsan kóshesindegi jeli ary qarai Tóle bi, Shyǵys ainalma jolyna deiin sozylady. Bul másele qoǵamdyq talqylaýǵa shyǵaryldy. Qazir osy baǵyttaǵy jasalǵan jumysqa qatysty talqylanatyn másele kóp. Álbette jobany iske qospas buryn jergilikti turǵyndardyń pikirin eskeremiz», - dedi ákim.
Ol sondai-aq, LRT jelisi týraly aitty.
«LRT jelisi alańyn daiyndaý jumysy áli aiaqtalmady. Qazir qarajat máselesin qarastyryp jatyrmyz. Atap aitqanda, sheteldik qarjy uiymdarymen bailanysyp jatyrmyz. Qalalyq biýdjetke barynsha tiimdi jaqtary qarastyrylýda. Álbette nesie dollar valiýtasynda bolsa, biýdjetke kúsh túsetini anyq. Biz qalaisha bul júktemeni kóterip júre alamyz? Jobany tolyq qolǵa almas buryn qarjylyq modelin oilastyryp alǵanymyz durys», - dedi ákim.
Ákim sonymen qatar, Shyǵys jáne Batys jańa vokzaldary týraly aitty.
«Shyǵys pen Batys vokzaldarynyń jumysy toqtamaidy. Burynǵy Saiahat avtovokzaly mańynda jekemenshik iesiniń qyzyǵýshylyǵy paida boldy. Bul jobany eki jaqtap igeretin bolsaq, investorlar osy nysannyń, kólik habynyń iesi bolady. Kólik habyn qurýǵa kirisetin bolady. BRT jobasyna arnaiy depo kerek. Talǵardan kelgen jolaýshylar otyryp ketýi úshin», - dedi ákim.
