Almaty ákimi Baqytjan Saǵyntaev megapolistegi epidemiologiialyq jaǵdaiǵa arnalǵan onlain brifingte qalanyń «qyzyl» aimaqqa kirý sebebin túsindirdi, dep habarlaidy "Ult aqparat".
Birinshi sáýirdegi jaǵdai boiynsha koronavirýs infektsiianyń 595 jaǵdaiy tirkeldi,onyń 497-si simptomdy jáne 98-i simptomsyz.
«Qalada koronavirýs boiynsha epidemiologiialyq jaǵdai kúrdelene túsýde. Ótken aidyń basynan bastap indettiń úshinshi tolqyny bastaldy. Oǵan sebep mýtatsiialanǵan shtamdardyń paida bolýy», - deidi ákim.
Onyń aitýynsha, megapolis zerthanalarynda 113 synamanyń mýtatsiia yqtimaldyǵyna zertteýler júrgizildi. 63 synamada mýtatsiianyń joǵary yqtimaldyǵy anyqtaldy, ol qala boiynsha orta eseppen 56 paiyzdy qurady. 113 synamanyń 31-inen britandyq shtamm anyqtaldy.
«Sondyqtan qalada qatań shekteý sharalary engizildi. Sonymen qatar, mýtatsiialanǵan shtamdarda qysqa inkýbatsiia kezeńi baiqalady. Sol úshin ol barlyq toptaǵy adamdarǵa, onyń ishinde 1 jasqa deiingi balalarǵa da qaýip tóndiredi. Qazirgi basty mindet - koronavirýstyń jańa tolqynyn toqtatý»,-deidi Baqytjan Saǵyntaev.
