Almatyda epidemiologiialyq jaǵdai kúrdeli, biraq baqylaýda. Bul týraly búgin Almaty qalasynyń ákimi Baqytjan Saǵyntaev QR Prezidenti janyndaǵy Ortalyq kommýnikatsiialar qyzmeti alańynda ótken onlain brifing barysynda aitty, dep habarlaidy QazAqparat.
Baqytjan Saǵyntaevtyń aitýynsha, Memleket basshysynyń tapsyrmasyna orai elimizde engizilgen eki aptalyq shekteýge bailanysty eki kúnnen beri jumys júrgizilip jatyr. Memlekettik komissiianyń sheshimine sáikes, birqatar kásiporyn jumysyn toqtatty.
«Onyń deni shaǵyn jáne orta bizneske bailanysty. Jalpy, 680 myńǵa jýyq jumys ornynyń qyzmeti toqtatyldy», - deidi qala basshysy.
Sonymen qatar, ol qaladaǵy epidemiologiialyq ahýalǵa toqtaldy.
«Epidemiologiialyq jaǵdaiǵa keler bolsaq, jaǵdai baqylaýda, biraq kúrdeli. Jalpy, óńirde 6 202 virýs juqtyrý jaǵdaiy tirkelgen. Kúndelikti ósim 1,1%, onyń ishinde syrqattanǵandardyń negizgi bóligi jumysqa qabiletti turǵyndar (82%). Indetten 2 485 adam jazylyp shyqsa, 26 adam kóz jumǵan. 6 shildede anyqtalǵan naýqastar sany – 113, reanimatsiiada 64 naýqas jatyr. Aýrýdyń aýyrlyq dárejesine nazar salar bolsaq, jaǵdaiy asa aýyr naýqastar sany - 24, osyndai naýqastar sany arta túsýde. 1 264 naýqastyń jaǵdaiy ortasha aýyr jáne 135 naýqastyń jaǵdaiy qanaǵattanarlyq deńgeide», - dedi Baqytjan Saǵyntaev.
