Almaty ákimi Baqytjan Saǵyntaev halyqpen esepti kezdesýinde ekologiiaǵa qatysty túitkildi máselege nazar aýdardy, dep habarlaidy QazAqparat.
Onyń aitýynsha, turǵyndardyń 60-70%-yn osy másele alańdatady.
«JEO kómirden gazǵa aýystyrý tarifke áser etedi. Osy jumyspen ainalysqan sarapshylar «halyq bul qyzmettiń qymbattaýyna daiyn ba?» degen suraq qoidy. Olar oǵan basyn aýyrtpasyn. Men aitqanymdai, 2012 jyldan bastap avtobýs marshrýttaryn sýbsidiialap kelemiz. Ár turǵyn 80 teńgemen qalanyń kez kelgen núktesine barý úshin. Eger kerek bolsa, biýdjet buǵan da barady. Eń aldymen muny qalai júzege asyramyz, biz sony oilaýymyz kerek. Jańa JEO salyna ma, joq eskisi gazǵa aýysa ma osy máseleni anyqtap alýymyz kerek», - dedi ákim.
Qala ákimi ákimdikte iskerlik keńes qurylǵanyn habarlady. Bul keńestiń ishindegi ekologiialyq komitet osy suraqtarmen tikelei ainalysatyn bolady.
«Avtoókólikterge kelsek, kezinde osy baǵytta strategiia qabyldandy. Qazir bul salaǵa Máskeýden mamandar tartyp jatyrmyz. Qala kóshelerin qalai jeńildetýge bolady? Qytaidaǵydai jup jáne taq sandy nómirlerge arnaiy kún belgileimiz be? Álde Londonnyń ortalyǵy siiaqty qymbat qylamyz ba? Osynyń bárin talqylaýdan soń bir toqtamǵa kelemiz», - dedi ákim.
Qala basshysy aýanyń lastyǵyn baqylaityn táýelsiz monitoring toby qurylatynyn aitty.
