«Almaty jastary 3.0» jeńildetilgen nesie berý baǵdarlamasy keler jyly da jalǵasady. Bul týraly qala ákimi Baqytjan Saǵyntaev «Almaty» telearnasynda tikelei efirde aitty, dep habarlaidy "Ult aqparat".
Qala ákiminiń aitýynsha, 2021 jyldyń 10-31 naýryzy aralyǵynda «Almaty jastary 3.0» qalalyq baǵdarlamasy aiasynda ótinish men qujat qabyldandy, munda bastapqy jáne qaitalama naryqta baspana alý úshin 5 paiyzdyq jeńildikpen nesie beriledi.
Baǵdarlama aiasynda 1 000 jas otbasyny qamtý josparlanǵan, olardyń arasynda eń kóp suranysqa ie mamandyqtar bar. Olar meditsina qyzmetkerleri, muǵalimder, JOO-nyń jáne ǴZI-nyń oqytýshylary men ǵylymi qyzmetkerleri, mádeniet jáne sport salasynyń qyzmetkerleri, jýrnalister, jazýshylar, halyqty áleýmettik qorǵaý salasynyń jáne quqyq qorǵaý organdarynyń qyzmetkerleri.
Buryn habarlanǵandai, biyl túsken 9 741 ótinishtiń 5 913-i oń sheshildi. 30 sáýirde iriktelgen alǵashqy 500 qatysýshyǵa ótinim saitynda joldama berildi. Kelesi aptada, 7 kúnnen soń kelesi 500 joldama tapsyrylady. Azamattardyń jappai shoǵyrlanýyn boldyrmaý maqsatynda joldama kezeń- kezeńmen beriledi.
«Baǵdarlama úlken suranysqa ie. Sondyqtan ony júzege asyrý keler jyly da jalǵasady. Ótinimdi qabyldaýdyń bastalýy týraly aqparat baǵdarlamanyń saitynda jáne BAQ-da jariialanady»,- dedi Baqytjan Saǵyntaev.
