QR Premer-Ministri Baqytjan Saǵyntaev Aqtóbe oblysyna jumys sapary barysynda «Nurly jer» baǵdarlamasy aiasynda tez salynatyn az qabatty nesiege beriletin turǵyn úi qurylysy boiynsha pilottyq jobany aralady, dep habarlaidy "Ult aqparat" QR Premer-Ministriniń baspasóz qyzmetine silteme jasap.
Nysandy aralaý barysynda B.Saǵyntaevqa «Nur Aqtóbe» turǵyn úi alabyndaǵy turǵyn úilerdi salý barysy, jobalyq sheshim erekshelikteri jáne beriletin páterler sapasy týraly baiandaldy. Nysandardyń qurylysynda paidalanylatyn materialdardyń 65% jergilikti kásiporyndarda óndiriletinin aita ketken jón.
Barlyǵy «Nurly jer» baǵdarlamasy boiynsha Aqtóbe oblysynda 2017 jyly 500-den kem emes az qabatty turǵyn úi salý josparlanyp otyr, bul turǵyn úi kezeginde turǵan 700-den astam otbasyny qolaily baspanamen qamtamasyz etýge múmkindik beredi. Bul osy óńir úshin erekshe ózektilikke ie, sebebi QR Prezidentiniń tapsyrmasy boiynsha, munda aýqymdy aglomeratsiia damyp, Aqtóbe qalasy zamanaýi ýrbanistik ortalyqqa ainalýy tiis.
Eske sala keteiik, QR Prezidenti N. Nazarbaev óziniń «Qazaqstannyń úshinshi jańǵyrýy: jahandyq básekege qabilettilik» atty Joldaýynda «Nurly jer» turǵyn úi baǵdarlamasyn júzege asyrýdy Úkimettiń taiaý keleshektegi basymdyqty mindetteriniń biri retinde atap kórsetken, sebebi baǵdarlama aldaǵy 15 jylda 1,5 million otbasyn turǵyn úimen qamtamasyz etýge baǵyttalǵan.
Aita ketý kerek, Baǵdarlamada turǵyn úi naryǵyn damytýdyń keshendi sharalary qamtylǵan. Bul - qurylys salýshylar úshin memlekettiń sýbsidiialaýdy usynýy esebinen bank nesielerin arzandatý, sonymen qatar halyqqa arnalǵan ipotekalyq nesielerdi sýbsidiialaý.
