Stýdentterdi jataqhanamen qamtamasyz etýge baǵyttalǵan jumystar keibir óńirde múldem qolǵa alynbaǵan. Bul týraly búgin Úkimet otyrysynda QR Premer-Ministri Baqytjan Saǵyntaev aitty, dep habarlaidy QazAqparat tilshisi.
«Biz sońǵy ailarda kóp óńirlerge eskertý jasadyq. Kórip otyrmyz, jarty jyldyń qorytyndysy boiynsha ásirese sońǵy aida úlken ózgerister boldy. Soǵan qaramastan mysaly úi qurylysyna keletin bolsaq kópqabatty úilerdi paidalanýǵa berý Almaty oblysynda - 20, Atyraý oblysynda - 45, Jambyl oblysynda - 35, Túrkistan oblysynda - 30, Almaty qalasynda 56 paiyzdy quraidy. Qyzylorda oblysynda birde-bir úi joq. Jarty jyl ótti, sol 20-30 paiyzdyń sońynda júrmiz», - dedi Úkimet basshysy.
Sonymen qatar Premer-Ministr Elbasynyń 5 áleýmettik bastamasynda kóterilgen stýdentterdi jataqhanamen qamtý tapsyrmasyn oryndaýda da kemshilikter oryn alyp jatqanyn basa aitty.
«Qajetti qarjy berilgen, jumystyń barlyǵy atqaryldy dep baiandap otyrsyzdar. Al Elbasynyń 5 áleýmettik bastamasyna kiretin jataqhana máselesine keletin bolsaq, 8 óńirde ǵana jataqhana berýge qol jetkizilgen. Olar: Aqmola, Almaty, Atyraý, BQO, Qaraǵandy, ShQO, Astana men Almaty qalalary. Basqa óńirlerde birde-bir jataqhana, birde-bir sharshy metr paidalanýǵa berilmegen. Osyny eskerińizder», - dedi Baqytjan Saǵyntaev oblys ákimderine qarata.
