Memlekettik jalpyǵa mindetti bilim berý standartynda búldirshin úsh tildi qatar meńgerýi kerek dep jazylmaǵan. Balabaqshaǵa kýrstar ata-analar suranysyna sai engizilip otyr. Iaǵni ata-analar balalaryn qansha tilde oqytatyn balabaqshaǵa jiberetinin ózi sheshedi. Bul týraly búgin QR bilim jáne ǵylym ministri Erlan Saǵadiev prezidenttiń Qazaqstan halqyna Joldaýy aiasynda mektepke deiingi tárbieleý men oqytý, onyń ishinde balalardyń erte damýyna arnalǵan baǵdarlamalardyń biryńǵai standarttaryn engizý máseleleri boiynsha ótkizilgen otyrys kezinde aitty, dep habarlaidy Sputnik Qazaqstan tilshisi.
Áleýmettik-mádeni damý jáne ǵylym komitetiniń múshesi Murat Bahtiiaruly balabaqshalarda búldirshinderdi úsh tilde oqytýdyń keri áseri bolýy múmkin ekendigine toqtaldy. Aitýynsha, osydan 25 jyl buryn balabaqshada úsh tilde oqytýdy júzege asyrǵan memleketter búginde úlken qiyndyqqa tap bolyp otyr. Munymen qatar, maman sheteldik professormen osy taqyryp tóńireginde pikir almasqanyn jetkizdi. Óz kezeginde QR bilim jáne ǵylym ministri Erlan Saǵadiev balabaqshalarǵa nelikten aǵylshyn tili kýrstary engizilgenin túsindirip ótti.
"Sońǵy ýaqytta balalardy úsh tilde oqytýǵa qatysty ata-analar tarapynan usynys kóp túskenin baiqadyq. Osy máselege kelgende bizdiń ustanymymyz – ata-analar ózderi sheshsin. Balalaryn úsh tildi balabaqshaǵa bergisi kelse, bersin. Kerisinshe balalarynyń bir tildi ǵana meńgergenin qalasa, ony da ózderi sheshsin. Bastysy biz búldirshinderge úsh tildi qatar meńgerýge jaǵdai jasap otyrmyz", — dedi Erlan Saǵadiev.
Ministrdiń jaýabynan keiin áleýmettik-mádeni damý jáne ǵylym komitetiniń múshesi Sergei Ershov bul jaýapty áli de túsinbegenin jetkizdi. Munymen qatar, maman ministrden búldirshin mektepke qandai bilim qorymen barýy kerektigin surady. Ministr óz kezeginde búldirshinderdiń shetel tilin meńgerýlerine qatysty qandai da bir memlekettik standart joqtyǵyn aityp ótti.
"Memlekettik jalpyǵa mindetti bilim berý standartyn bekitý kezindebalabaqshalarǵa qoiylar talap az. Iaǵni búldirshin mektepke barǵanǵa deiin belgili bir deńgeide bilimdi bolýy kerek dep talap qoimaimyz. Sondai-aq, bekitilgen standartta bala úsh tildi qatar bilýi kerek dep jazylmaǵan. Eger balabaqsha ata-analar suranysyna sai qandai da bir kýrs engizemiz dese, biz qarsy emespiz. Tek mindetti túrde ministrlik tapsyrǵan 25 minýttan 2-3 sabaqtaryn ótkizse bolǵany", — dedi bilim jáne ǵylym ministri.
Munymen qatar, ministr ár balanyń qyzyǵýshylyǵy ártúrli bolatynyn aitypótti. Bireýleri til úirenýge qyzyqsa, ekinshileri robotehnikamen ainalysqandy unatady.
Búgingi tańda Qazaqstan Respýblikasy boiynsha 10 314 mektepke deiingi uiym jumys isteidi. Olarda 1-6 jastaǵy 880 myń búldirshin tárbielenip jatyr. Al 1-3 jas aralyǵyndaǵy balalar jalpy 40 memlekettik jáne 1 350 jekemenshik balabaqshaǵa baryp júr. Olardyń ishinde 130 myń balanyń ata-anasy memlekettik balabaqshany tańdasa, 47 myń ata-ana balalaryn jekemenshik balabaqshalarǵa berýdi uiǵardy.
