Jańa oqý jylynan bastap oblystardaǵy 100-150 mektepte qazaq tilin oqytýdyń jańa ádistemesi engiziledi. Bul týraly búgin bilim jáne ǵylym ministri Erlan Saǵadiev Aqtóbede pedagogtarmen kezdesýinde aitty, - dep habarlaidy Azattyq tilshisi.
Saǵadievtiń sózine qaraǵanda, qazir Qazaqstanda orys mektepterinde oqityn 500 myńnan astam bala qazaq tilin bilmeidi jáne bul máseleni sheshýde qazaq tilin oqytýdyń jańa ádistemesi daiyndalǵan.
- Balany sóileýge "májbúrleitin" bul kommýnikativti ádistemeni qoldanýda sózdik qor shekteýli bolady. Sol arqyly oqýshylardy meilinshe jyldam qazaqsha sóiletemiz. Ministrlik sonymen qatar jii qoldanylatyn sózderdiń sózdigin de ázirlep qoidy, - dedi Saǵadiev.
Ministrdiń málimetinshe, mektep jasyndaǵy qazaq balalarynyń 90 paiyzy ana tilin biledi.
Oblystyq bilim berý basqarmasynyń habarlaýynsha, ministr men pedagogterdiń kezdesýi jabyq túrde ótken.
