Respýblikalyq biýdjet esebinen jyl saiyn 170-ke deiin mektep salynǵanyna qaramastan, elde úsh aýysymdy jáne apatty mektepter problemasy saqtalýda. Bul jóninde búgingi Úkimet otyrysynda bilim berý men ǵylymdy damytý boiynsha memlekettik baǵdarlamanyń 2018 jyldyń birinshi jartyjyldyǵynda iske asyrý máselesi jóninde baiandaǵan QR Bilim jáne ǵylym ministri Erlan Saǵadiev málimdedi, dep habarlaidy Baq.kz tilshisi.
«Qala men aýyl mektepteriniń bilim sapasy arasyndaǵy aiyrmashylyq saqtalyp otyr. 9 jáne 4 synyp oqýshylarynyń arasynda syrttai baǵalaý nátijesi boiynsha memlekettik baǵdarlamanyń josparlanǵan kórsekishine qol jetkizilgen joq. Osy aiyrmashylyqty joiý úshin Dúniejúzilik banktiń arnaiy kredit qarjysyn jumsap, aýyl mektepteriniń materialdyq-tehnikalyq bazasyn kúsheitý, aýyl muǵalimderiniń bilim sapasyn kóterý jumystary bastaldy», - dedi ministr.
Saǵadievtiń aitýynsha, eldegi úsh aýysymdy mektep máselesi áli de tolyq sheshimin tappai otyr.
«Respýblikalyq biýdjet esebinen jyl saiyn 110-nan 170-ke deiin mektep salynady. Alaida, úsh aýysymdy jáne apatty mektepter problemasy saqtalýda. Ony úlken qalalarda jan basyna qarjylandyrý mehanizmi arqyly sheshetin bolamyz. Búgingi kúni elde úsh aýysymdaǵy 120-ǵa jýyq mektep bar. Onyń ishinde, Almaty oblysynda 27, Aqtóbe oblysynda 24, Túrkistan oblysynda 12, Aqmola oblysynda 12, Atyraý oblysynda 11 mektep», - dedi vedomstvo basshysy.
Ministrdiń bergen málimetine sáikes, elde 44 mektep apatty jaǵdaida tur. Onyń kóbi Túrkistan oblysynda tirkelgen. Munda tozyǵy jetken 12 mektep bolsa, dál osyndai bilim oshaǵy Jambylda – 7, Atyraý – 6, BQO – 6.
«Úsh aýysymda oqityn mektepterdiń bolýynyń basty sebebi demografiialyq jáne migratsiia protsesteri. Mysaly, 2017 jyly Astanaǵa elimizdiń basqa aimaǵynan 80 myńǵa jýyq adam kóship kelse, olardyń 17 myńǵa jýyǵy - balalar. Bul jyl saiyn shamamen 15 jańa úlken mektep salý qajettiligin týyndatady. Qazirgi ýaqytta memleket mektepti jappai salýǵa buryn bolmaǵan qarajat bólse de, osy máseleni tolyǵymen sheshý úshin jan basyna qarjylandyrý, iaǵni, jeke menshik kompaniialardy mektepter salýǵa tartý jumysyn barlyq qalada qazirden bastap qolǵa alý qajet bolyp tur», - dedi Saǵadiev.
Buǵan deiin habarlaǵanymyzdai, Bilim jáne ǵylym ministri eldegi keibir óńirler jańa oqý jylynda oqýlyqsyz qalý qaýpinde turǵanyn aitty.
