Tokioda Olimpiada oiyndarynda bokstan erler men áielder arasynda jekpe-jekter jalǵasyp jatyr, dep habarlaidy Olympic.kz.
63 kelide judyryqtasatyn qazaqstandyq boksshy Zákir Safiýllin shirek finalǵa shyqty.
Otandasymyzdyń qarsylasy japoniialyq Daisýke Narimatsý bolatyn. Alaida, japoniialyq boksshy jaraqatyna bailanysty sharshy alańǵa shyqpady. Nátijesinde, qazaqstandyq Zákir Safiýllin kelesi ainalymǵa ótti.
Otandasymyz alǵashqy kezeńde perýlik Leodan Pezo Saboiiamen kezdesken bolatyn. Qazaqstandyq boksshy qarsylasyn 5:0 esebimen jeńgen edi.
Zákir Safiýllin Túrkistan oblysynda týǵan. Quramadaǵy tájiribeli boksshylardyń biri, jasy - 34-te. Aziia chempionatyna eki márte kúmis júldeger atanǵan.
Aita keteiik, Olimpiadada tórt boksshymyz qaldy. Olar - Zakir Safiýllin (63 keli), Sáken Bibosynov (52 keli), Ábilhan Amanqul (75 keli) men Qamshybek Qońqabaev (91 keliden joǵary). Búgin Sáken Bibosynov ekinshi ainalymda taǵy jeńiske jetip, shirek finalǵa shyqty.
Qalǵan tórt boksshy jarys jolyn aiaqtaǵan bolatyn. Atap aitqanda, Serik Temirjanov (57 keli) ekinshi ainalymnan asa almasa, 69 keli salmaq dárejesinde Abylaihan Júsipov amerikalyq boksshyǵa jol berdi. Al Vasilii Levit (91 keli) nokaýtpen utyldy. Álem chempiony Bekzad Nurdáýletov te birinshi jekpe-jekte reseilik boksshydan jeńilip qaldy. Qazaqstannyń áielder komandasy atynan Tokio Olimpiadasyna barǵan jalǵyz boksshy Nadejda Riabets (75 keli) birinshi jekpe-jekte utylyp qaldy.
