21 jastaǵy qazaqstandyq boksshy Sadriddin Ahmedovtiń (7-0, 7KO) Almatyda ótetin titýldyq jekpe-jektegi qarsylasy anyqtaldy, dep habarlaidy QazAqparat.
Búgin «Eye of the Tiger Management» promoýterlik kompaniiasynyń boksshysy Sadriddin Ahmedovtiń qarsylasy belgili boldy. «Qazaqstannyń kásipqoi boksy» BoxRec.com saityna silteme jasap habarlaýynsha, birinshi orta salmaqtaǵy WBC Asia titýly úshin aiqas Ahmedov pen 25 jastaǵy Indoneziia ókili Djon Rýba (17-5-1, 9KO) arasynda ótedi. Jekpe-jek 10 raýndqa eseptelgen.
Eske salsaq, Sadriddin Ahmedov 26 qańtar kúni Kanadanyń Monreal qalasynda ótken kezdesýinde meksikalyq Abraham Hýaresti (13-2, 5KO) nokaýtqa túsirip, jastar arasyndaǵy WBC beldigin jeńip alǵan bolatyn.
Aita keteiik, buǵan deiin 24 naýryz kúni «Almaty Arena» kesheninde kásipqoi boks keshi ótetinin jazǵan edik. Oǵan Qazaqstan, Resei, Afrika elderi, Venesýela, Ózbekstan, Belarýs, Grýziia jáne basqa da memleketterdiń boksshylary qatysatyny josparlanǵan.
«SULEIMEN Promotions» promoýterlik kompaniiasynyń aqparatyna sáikes, «Almaty Arenadaǵy» boks keshinde barlyǵy 8 aiqas ótedi.
«Keshtiń basty titýldyq kezdesýleri - jeńilip kórmegen Aidos Erbosynuly men Nursultan Jańabaevtyń qatysýymen ótetin jekpe-jekter bolmaq. Aidos Erbosynuly (10-0-8KO) ekinshi orta salmaqta ońtústikafrikalyq Lýkas Ndafolýmmen (15-1-6KO) qolǵap túiistiredi. Atalmysh kezdesýde WBA INTERNATIONAL chempiondyq beldigi tigilip, WBC ASIA i WBO GLOBAL beldigi qorǵalmaq. Lýkas Ndafolýmnyń laqap aty «Kúiretýshi». Al Nursultan Jańabaev (6-0-4KO) WBA INTERCONTINENTAL titýly úshin Venesýela eliniń boksshysy Ivan Matýtemen (28-1-23 KO) shyǵady. 25 jastaǵy venesýelalyq Ivan Matýte (laqap aty «El Demoledor») 28 aiqas ótkizip, 23-in nokaýtpen aiaqtaǵan», - delingen promoýterlik kompaniiasy habarlamasynda.
