Qazaqstandyq Sadriddin Ahmedov (10-0, 9KO) kásipqoi bokstaǵy onynshy jekpe-jegin ótkizdi, dep habarlaidy "Ult aqparat" VKontakte áleýmettik jelisindegi «Qazaqstannyń kásipqoi boksy» paraqshasyna silteme jasap.
S.Ahmedov Kanadanyń Kvebek qalasynda ótken boks keshinde óner kórsetti. Birinshi orta salmaqtaǵy aiqasta onyń qarsylasy meksikalyq «Kovboi», 31 jastaǵy Djonni Navarrete (33-15-2, 15KO) boldy. Jekpe-jek segiz raýndqa esepteldi.
Qazaqstandyq sportshy qarsylasynyń profi-ringtegi úlken jeńisterinen seskengen joq. Kerisinshe, bar tájiribesin kórsetýge tyrysyp baqty. Nátijesinde ony tehnikalyq nokaýtqa jiberip, Navarrette sońǵy raýndqa shyqpai qaldy.
Osylaisha, Sadriddin Ahmedov kásipqoi bokstaǵy onynshy jeńisine qol jetkizdi, onyń toǵyzyn merziminen buryn aiaqtady. Ol WBC nusqasy boiynsha jastar arasyndaǵy álem chempiony jáne birinshi jartylai salmaqta Aziianyń WBC chempiony. Jasy – 21-de.
Al Navarrete aiqastarynyń kóbin óz otanynda ótkizgen. Onyń qarsylastary birinshi orta salmaqtaǵy WBO álem chempiony Haime Mýngie (34-0, 27KO) men Saýl Alvarestiń baýyry Ramon Alvares (28-8-3, 16KO) bolǵan. Meksikalyq boksshy olarmen eki retten kezdesip, kóbinde jeńilgen. Bir márte Ramon Alvarespen teń túsken.
Aita keteiik, Boxrec.com málimeti boiynsha, qazaqstandyq sportshynyń kelesi aiqasy josparlanyp qoiǵan. Ol ringke 7 jeltoqsan kúni Kanadanyń Monreal qalasynda qaita shyǵady. Qarsylasy ázirge belgisiz.
