Búgin «Densaýlyq saqtaý salasyn tsifrlandyrý» taqyrybyndaǵy Úkimet saǵatynda Májilis depýtaty Nurtai Sabilianov DSM basshysy Eljan Birtanovqa meditsina salasyndaǵy problemalardy atap berdi, dep habarlaidy Baq.kz tilshisi.
«Jańa ǵana Densaýlyq saqtaý ministri Eljan Birtanovtyń baiandamasyn tyńdadyq. Maǵan ministr ertegi aityp jatqan sekildi boldy. Nege? Óitkeni, tsifrlandyrý bolý úshin densaýlyq saqtaý uiymdaryn, aýrýhanalardy, emhanalardy biz jaqsy, joǵary internet bailanysyna qosýymyz kerek. Jańaǵy Aqparat jáne kommýnikatsiialar ministrliginiń aitýynsha, bul 2022 jyly ǵana júzege asady. Qarajat bolsa... Sonda, bul tsifrlandyrý kimge júrgiziledi? Mysaly, óńirlerdi alyp qaraityn bolsaq, Soltústik Qazaqstan, Shyǵys Qazaqstan, Ońtústik Qazaqstan, Aqmola, Qostanai, Aqtóbe, Qaraǵandy oblystarynyń densaýlyq uiymdary bar-joǵy 14-43 paiyz ǵana internet júiesine qosylǵan. Sondyqtan, birinshi kezekte osyny sheshýimiz kerek. Qurmetti ministr, sizge aitarym, aspanǵa qarap, juldyzdy sanaǵannan góri jerdegi tirshilikke durys kózben qaraǵan jón sekildi», - dedi Sabilianov Birtanovqa.
Depýtattyń aitýynsha, eldi mekenderdiń meditsina salasynda áli de sheshilmegen kóptegen másele bar. Májilismen birqatar problemany da atap ótti.
«Aýdan men aýyldardaǵy meditsinalyq uiymdardy jańa jedel járdem avtokóliktermen qamtamasyz etý kerek. Qazirgi tańda Qazaqstan boiynsha 2124 jedel járdem kóligi bar desek, sonyń 36 paiyzy, iaǵni 770-si eski eken. Sonaý HH ǵasyrda shyǵarylǵan avtokólikter bar. Endi oilap qarańyz, qatty aiaz ben boranda eski avtokólikpen naýqastardy alyp kele jatqanda jolda buzylsa ne bolady? Osy jaǵyna nege kóńil aýdarmaisyz? Sizder aitasyzdar, olardy atqarýshy organ, ákimder alý kerek dep. Biraq, qarajatty báribir respýblikalyq biýdjetten bólý qajet. Sonda ǵana biz durys meditsinalyq kómek kórsete alamyz», - dedi Nurtai Sabilianov.
Sondai-aq, májilismen kóptegen jerde aýrýhana men emhanalardyń jaǵdaiy tómen, halyqqa qolaily jaǵdai jasalmaǵanyn aitty. Depýtattyń málimetinshe, ShQO Jarma aýdanynyń ortalyǵy - Qalbataý aýylyndaǵy aýrýhananyń jóndelmegenine 25 jyl bolǵan. Úrjar aýdanynyń ortalyǵynda múlde emhana joq, tek úsh dárigerlik ambýlatoriia qyzmet kórsetedi. Onyń bireýiniń ǵimaraty da joq.
«Qazaqstan shekarasynyń eń shetindegi Zaisan aýdanynyń aýrýhanasy tar, burynǵy balabaqsha ǵimaratynda ornalasqan. Ishinde sý joq, káriz júiesi joq. Adamdar turyp tur, sheshinetin jer joq. Osydan keiin meditsinalyq kómektiń joǵarǵy deńgeide ekenin qalai aitýǵa bolady? Osy máselelerdi sheshetin ýaqyt boldy ǵoi», - dedi Sabilianov.
Depýtat óńirlerde kadr tapshylyǵy bar ekenin, osyǵan orai jas mamandardy qoldap, dárigerlerdi baspanamen qamtamasyz etý kerektigin aitty. Sóz sońynda ol tsifrlandyrýdan buryn emhanalardaǵy tozyǵy jetken qurylǵylardy jańasymen almastyrý, halyqqa dári-dármekti ýaqytynda jetkizip, durys meditsinalyq qyzmet kórsetý kerektigin de atap ótti.
Eske salsaq, búgin Birtanov biylǵy maýsym aiynda elektrondyq densaýlyq pasporty men patsienttiń jeke kabineti pilot túrinde engiziletinin aitqan bolatyn. Sondai-aq, elimizde eńbekke ýaqytsha jaramsyz paraqtary e-gov arqyly berilip, tegin dári-dármekti «esikke deiin» jetkizý pilottyq jobasy iske qosylatynyn jetkizgen edi.
