Oppozitsiia Grýziia biligine burynǵy prezident Mihail Saakashvilidi 24 saǵattyń ishinde qala klinikasyna aýystyrýdy talap etip, ýltimatým qoidy. Talapty "Biryńǵai ulttyq qozǵalys" partiiasynyń jetekshisi Nika Meliia aýqymdy qarsylyq aktsiiasy kezinde aitty, - dep habarlaidy "Grýziia jańalyqtary" agenttigi.
"Ómiri men densaýlyǵyna qaýip tóndirmeý maqsatynda Mihail Saakashvilidi qala klinikasyna aýystyrý úshin bilikke 24 saǵat ýaqyt beremiz", - dep málimdedi Meliia.
Oppozitsiia talap oryndalmasa 8 qazan, dúisenbi kúni keshki saǵat segizde Tbilisi ortalyǵyndaǵy Bostandyq alańyna "búkil Grýziiany jinaýǵa" ýáde berdi. Meliianyń sózinshe, ózge talaptar Bostandyq alańynda sol kezde aitylatyn bolady.
Qarsylyq aktsiiasy Saakashvili otyrǵan Rýstavi qalasyndaǵy túrme aldynda jalǵasyp jatyr. Demonstranttardyń shaǵyn toby palatka quryp alǵan.
2013 jyldan beri Grýziiaǵa alǵash ret kelgen Mihail Saakashvili Tbilisige astyrtyn jolmen jetisimen 1 qazanda tutqyndalǵan. Ony buryn Grýziia soty qylmysker dep sanap, alty jylǵa qamaý týraly syrttai sheshim shyǵarǵan. Ózin saiasi tutqyn dep esepteitin Saakashvili túrmege qamalysymen qarsylyq bildirip, ashtyq jariialaǵan. Túrmeniń meditsina qyzmeti oǵan túrli qospa, shyryn jáne balalar piýresin berip otyr.
Jeke dárigeri, advokattary men jaqyndary burynǵy prezidenttiń álsirep bara jatqanyn kún saiyn aityp, qaladaǵy kóp salaly aýrýhanaǵa aýystyrýdy talap etip keledi. Alaida bilik keliser emes.
