Grýziianyń burynǵy prezidenti Mihail Saakashvili eline oralǵanyn habarlady. Ol 1 qazanda Facebook paraqshasynda "Qaiyrly tań, Grýziia! Segiz jyl ótip ketipti" dep jazdy.
Keiin Saakashvili videoúndeý jariialap, Batýmide ekenin aitty. Video túnde jazylǵandyqtan, onyń qaida túsirilgenin ajyratý múmkin emes. Saakashvili azamattardy 2 qazan kúni jergilikti sailaýǵa qatysyp, odan soń Tbilisi ortalyǵyna jinalýǵa shaqyrdy.
Al Grýziia IIM Saakashvilidiń shekaradan ótpegenin habarlady. Bul jóninde "InterpressNiýs" jáne RIA Novosti agenttikteri jazdy.
Saakashvili qurǵan partiia ókilderi On.ge basylymyna saiasatkerdiń qaida ekenin bilmeitinin aitqan.
Grýziianyń burynǵy prezidenti birneshe kún buryn elge 1 qazan keshke oralatynyn aityp, jaqtastaryn saiasi quqyqtary úshin kúresýge shaqyrǵan. Grýziia premer-ministri Iraklii Garibashvili Saakashvili kelse, birden tutqyndalatynyn aitqan.
2018 jyly maýsym aiynda grýzin soty Saakashvilidi "prezident bolyp turǵan tusta qyzmettik ókiletin asyra paidalandy" jáne "parlament músheleriniń soqqyǵa jyǵylýyna qatysty dálelderdi jasyrýǵa tyrysty" dep aiyptap, syrttai 6 jylǵa sottaǵan.
Qazir Grýziiada basqarýshy "Grýzin armany" partiiasy men Saakashvili qoldaityn oppozitsiia arasynda jaǵdai ýshyqqan. Oppozitsiia byltyr bilikti parlament sailaýynyń nátijesin burmalady dep aiyptaǵan. Al halyqaralyq baqylaýshylar sailaýdyń básekege sai jáne negizgi sailaý quqyqtary saqtalǵanyn aitqan.
