London - 2012 Olimpiadasynyń chempiony, Beijiń-2008 jáne Rio-2016 Olimpiada oiyndarynyń júldegeri Olga Rypakova baspasóz máslihatyn ótkizip, jankúierlerine alǵys aitty, dep habarlaidy "Ult aqparat".
«Barlyq jankúierlerge, qazaqstandyqtarǵa qoldaý kórsetkenderińiz úshin, áleýmettik jelide jazǵan jyly sózderińiz úshin, qońyraý shalǵandaryńyz úshin rahmet aitqym keledi. Jan tebirentetin tilekter men qoldaý boldy. Osy tórt Olimpiada boiy árqashan menimen birge boldyńyzdar, qoldadyńyzdar. Men úshin bul óte mańyzdy», - dedi Olimpiada chempiony Ortalyq kommýnikatsiialar qyzmetinde.
Sportshynyń aitýynsha, kóńil-kúii men jalpy jaǵdaiy jaqsy bolǵan.
«Men burynǵydai tolyq oiyn kórsetýge daiyn boldym. Ne nárse durys shyqpaǵanyn bilmeimin. Ózim de tolyq túsinbedim. Jańa ǵana stadionnan keldim, áli jattyqtyrýshymen áńgimelesip, taldaý jasamadyq. Árine, ózimniń sońǵy olimpiadamdy sátti ótkizgim keldi, jankúierlerimdi taǵy da qýantqym keldi. Jeńis tuǵyryna shyǵyp, qýanysh sezimin syilaǵym keldi. Biraq bul árdaiym bola bermeidi. Aýa raiy keremet, jaǵdaiymyz da jaqsy, biraq bir nárse bolmai qaldy. Qatelikterdi qaraimyz jáne talqyǵa salamyz», - dedi jeńil atlet.
Olga Rypakova aldyńǵy jáne osy Olimpiadalar arasynda aiyrmashylyq sezilgenin atap ótti.
«Munda kórermenderdiń joqtyǵyn aitamyn. Jarys kezinde esh kórermen bolmady. Bul da seziledi eken. Jankúierlerge jáne Olimpiadanyń uiymdastyrý komitetine taǵy da rizashylyǵymdy bildirgim keledi, olar qiyn jaǵdaida da Olimpiada oiyndaryn ótkizdi. Olar úlken alǵys pen qurmetke laiyq», - dedi Olga Rypakova.
