Ulybritaniia astanasy London qalasynda jeńil atletikadan ótip jatqan Álem chempionatynda áielder arasynda úsh márte qarǵyp sekirýden jeńimpaz-júldegerler anyqtaldy, dep habarlaidy "Ult aqparat".
Birinshi múmkindiginde-aq 14,45 metrge sekirgen 33 jastaǵy Olga Rypakova qos márte álem birinshiliginiń jeńimpazy, Rio Olimpiadasynyń chempiony, kolýmbiialyq Katerina Ibargýen men budan bir jyl buryn Braziliia jerinde kúmis júldeger atanǵan 22 jasar venesýelalyq Iýlimar Rohastan keiin alǵashqy úshtikke ilikti.
Ekinshi ret sekirgende Iu.Rohas 14,83 metr nátijemen kósh bastady. Úshinshi múmkindiginde O. Rypakova 14,77 metr nátijemen ekinshi orynǵa kóterildi. Áitse de ataqty kolýmbiialyq, Rio Olimpiadasynyń chempiony K.Ibargýen 14,89 metr nátijemen kósh basyna shyqty.
Besinshi múmkindiginde Iu.Rohas 14,91 nátijemen qaitadan alǵa ketti. Budan keiin úzdik kórsetkishke eshkim qol jetkize alǵan joq. Osylaisha, óziniń jastyǵy men múmkindiginiń mol ekendigin kórsete bilgen venesýelalyq jeńil atlet alǵash ret álem chempiony atandy. K.Ibargýen kúmis, O.Rypakova qola júldege qol jetkizdi.
Eske sala keteiik, budan bes jyl buryn dál osy Londonda Olga Rypakova jazǵy olimpiada oiyndarynyń chempiony atanǵan bolatyn. Sonymen qatar Beijiń men Rio-de-Janeiro olimpiadalarynda qazaqstandyq jeńil atlettiń qola júldeni enshilegeni belgili.
8 tamyzda qazaqstandyq Viktoriia Ziabkina 200 metrge júgirý jarysynda júldege talasady. Ziabkina - 100 jáne 200 metrge júgirýde úsh dúrkin ýniversiada chempiony, tórt dúrkin Aziia chempiony.
