Qazaqstannyń birinshi, álemniń 23-raketkasy Elena Rybakina alǵash ret Ýimbldon týrniriniń shirek finalyna shyqty, dep habarlaidy QazAqparat.
Ulybritaniia ashyq chempionatynyń 17-raketkasy bolyp tirkelgen Rybakina tórtinshi ainalymda dúniejúzilik reitingte 80-orynda turǵan horvatiialyq Petra Martichpen sheberlik baiqasty.
Birinshi partiia barysynda Martich alǵa ketkenimen, Elena esesin jibermedi. Esep 5:5 bolǵan mezette óz geimin alyp, setti breikpen támamdady – 7:5.
Ekinshi partiiada Rybakina sol qarqynyn báseńdetken joq – 6:3.
1 saǵat 22 minýtqa sozylǵan báseke barysynda qazaqstandyq sportshy 6 eis jasap, 7 breik-pointtyń 4-eýin paidalana bildi.
Rybakina jartylai finalǵa shyǵý úshin álemniń 37-raketkasy, frantsiialyq Alize Korne nemese reitingte 44-satyda turǵan aýstraliialyq Aila Tomlianovichtiń bireýimen talasady. Korne munyń aldynda osyǵan deiin 37 match boiy jeńilmegen álemniń 1-raketkasy, Polsha ókili Iga Sventekti utyp ketken bolatyn – 6:4, 6:2.
