Rýslan Ysqaqov Qazaqstannyń Damý bankin basqarady, - dep habarlaidy "Ult aqparat" «Báiterek» ulttyq holdinginiń baspasóz qyzmetine silteme jasap.
«Báiterek» ulttyq basqarýshy holdingi» AQ aktsioneriniń sheshimi boiynsha Rýslan Viktorovich Ysqaqov 16 aqpannan bastap «Qazaqstannyń Damý banki» AQ (QDB) basqarma tóraǵasy jáne direktorlar keńesiniń múshesi bolyp sailandy. Ol buǵan deiin holdingtiń enshiles uiymy - «KazakhExport» eksporttyq saqtandyrý kompaniiasy» AQ-ny basqardy», - delingen habarlamada.
QDB ujymyna jańa basshysyn «Báiterek» holdinginiń Basqarma tóraǵasy Qanat Sharlapaev tanystyrdy.
«Rýslan Viktorovichtiń qarjy uiymdarynda 18 jyldan asa jumys tájiribesi bar, alty jyl boiy KazakhExport-ty basqardy jáne búginnen bastap Qazaqstannyń Damý bankiniń basshysy bolyp taǵaiyndaldy. Is-árekettegi meritokratiia qaǵidaty týraly aitqym kelip otyr: bank naryǵynda jáne bizdiń holdingte tabysty jumys istegen adam endi eń joǵary pozitsiialardyń birine jetti. Ony qoldap, birge tabysty jumys isteisizder dep senemin», - dedi Sharlapaev QDB ujymyna arnaǵan sózinde.
Rýslan Iskakov 1980 jyly týǵan. 2003 jyly Shákárim atyndaǵy Semei memlekettik ýniversitetin bitirip, ekonomist-menedjer biliktiligine ie boldy.
2004-2006 jyldary «Kazkommertsbank» AQ Táýekel menedjmenti departamentiniń qyzmetkeri bolyp jumys istedi.
2006-2008 jyldary – «Kazkommertsbank» AQ Táýekel menedjmenti departamenti Jobalyq táýekelderdi taldaý basqarmasynyń bastyǵy.
2010-2011 jyldary – «Sberbank Rossii» AQ EB AF Korporativtik klientter bóliminiń bastyǵy.
2011-2014 jyldary – «Sberbank Rossii» AQ EB Iri klientter departamenti direktorynyń orynbasary.
2014-2015 jyldary – «QazEksportGarant» SK» AQ Basqarma tóraǵasynyń orynbasary.
2016 jyldyń aqpan aiynan bastap «KazakhExport» ESK» AQ Basqarma tóraǵasy, Direktorlar keńesiniń múshesi qyzmetin atqardy.
Sonymen qatar, «QazTrade» saýda saiasatyn damytý ortalyǵy» AQ Direktorlar keńesiniń múshesi, «Baiterek Venture Fund» AQ Direktorlar keńesiniń múshesi jáne Qazaqstan shahmat federatsiiasynyń birinshi vitse-prezidenti retinde aqy tólenbeitin qyzmetterdi atqarady.
Aita keteiik, «KazakhExport» ESK» AQ basshysynyń mindetteri aǵymdaǵy jyldyń 16 aqpanynan bastap kompaniianyń Basqarma tóraǵasynyń orynbasary Jaqsybaev Raýan Ómirbekulyna júkteldi.
