«Astana» halyqaralyq qarjy ortalyǵy investorǵa qajet bolatyn barlyq quraldardy usynady. Bul týraly búgin Qazaqstan-Katar joǵary deńgeidegi birlesken komissiiasynyń 5-otyrysynda elimizdiń Ulttyq ekonomika ministri Rýslan Dálenov aitty, dep habarlaidy QazAqparat.
«Qarjylyq qyzmetter naryǵyn jandandyrý úshin katarlyq áriptesterime «Astana» halyqaralyq qarjy ortalyǵynyń múmkinshilikterin paidalanýǵa keńes beremin. AHQO investorǵa qajet bolatyn barlyq quraldardy usynady. AHQO zańnamasy aǵylshyn quqyǵyna negizdelgen jáne bizdiń elimizge óte qaýipsiz investitsiia salý úshin barlyq jaǵdaidy jasaidy», - dedi ministr.
Osy rette Rýslan Dálenov Katar investorlaryn Qazaqstan ekonomikasyna investitsiia salýǵa shaqyrdy.
«Búginde bizdiń qatynastarymyzdy tereńdete túsý álemdegi saýda, saiasi jáne ózge de shielenisterge orai dúniejúzilik ekonomika ósiminiń baiaýlaýyna bailanysty buryn-sońdy bolmaǵan ózektilikke ie», - dedi ol.
Otyrysqa Katar Memleketiniń Saýda jáne indýstriia ministri Ali ben Ahmed ál-Kývari bastaǵan katarlyq delegatsiia qatysty.
